Nagbitiw na sa puwesto si Light Rail Transit Authority (LRTA) Administrator Rafael Rodriguez.

Ayon sa pahayag ngayong umaga ni LRTA spokesperson Hernando Cabrera, pormal ng inihain ni Rodriguez ang kaniyang resignation letter kay Department of Transportation and Communication (DoTC) Sec. Mar Roxas.

Sinasabing epektibo Marso 31 umano ang pagliban ng opisyal.

Wala pang impormasyon kung sino ang hahalili sa iiwanang puwesto ni Rodriguez.

Sa Senado, nakabinbin ngayon ang panukalang pagtaas ng singil sa pamasahe sa MRT at LRT.

Pero ayon kay Sen. Manny Villar, 13 senador na ang pumabor sa kanilang resolusyon na nanawagan sa Malacañang na ipagpapaliban muna ang pagpapatupad ng dagdag na singil sa train system.

Ayon sa senador, ipapaabot nila ang resolusyon hindi lamang sa Malacañang kundi sa lahat ng may kinalaman sa isyu MRT-LRT fare hike.

Iginiit ng senador na hindi napapanahon para itaas ang singil sa tren lalo't sabay-sabay ang pagtaas ng mga bayarin at presyo ng mga bilihin ngayon.

"Ipakita muna nila na meron silang hakbangin para mapababa ang operasyon ng MRT/LRT sapagkat hindi pa sila nagkakaroon ng ganyang programa. Sa tatlong hearing, hindi pa sila nagpiprisinta ng kanilang strategy kung paano bababaan ang operating cost nila. At ito ang nakikita kong dapat unang gawin bago ipasa sa tao iyan. Pangalawa, hindi nararapat dahil ngayon ay sabay-sabay na tumataas ang gasoline, kuryente, tubig, at hindi naman dapat sabayan iyan ng increases sa MRT," ayon kay Villar.

Nabatid na sa Senate resolution 602 ni Villar kasama sina Sen. Ralph Recto at Joker Arroyo, sinabi na batay sa naging pagdinig ng Senate committee on public services, hindi kailangang dagdagan ang pamasahe sa MRT at LRT dahil may sapat na kita ang LRTA para tustusan ang operating expenses ng dalawang rail transit system.

Mayroon na din anilang P7.2 billion na pondo ngayong taon at may P1 bilyong savings ang MRT para makabili ng dagdag na mga bagon at para sagutin ang iba pang pangangailangan ng tren.

Tinawag na anti-poor ng tatlong senador ang planong fare hike dahil karamihan sa mga maapektuhang commuters ay mahihirap.

Ilan sa mga lumagda pabor sa resolusyon ay sina senators Juan Ponce Enrile, Tito Sotto, Jinggoy Estrada, Gringo Honasan, Chiz Escudero, Bongbong Marcos, Loren Legarda at Antonio Trillanes