ex-Rep. Iggy ArroyoLONDON - Kinilala ng korte sa London ang karapatan ni Grace Ibuna para maiuwi ang labi ng matagal nitong kinakasama na si dating Negros Occidental Rep. Ignacio "Iggy" Arroyo.

Sa ipinalabas na desisyon ni Justice Peter Smith ng UK High Court, kinatigan nito ang panig ni Ibuna at anak ni Iggy sa unang asawa na si Bernardina Arroyo-Tantoco.

Nag-isyu rin ang korte ng "joint letter of administration" kung saan pinapayagan ang dalawa na maiuwi ang labi ng namayapang mambabatas.

Una nang iginiit ni Aleli Arroyo, ang pangalawang asawa ni Iggy na siya ang may karapatan para maiuwi ang labi ng mister.

Sinasabing naging basehan umano ng korte sa desisyon nito ay ang last will and testament ng kongresista kung saan kinilala nito si Bernardina na siyang "executor" ng kaniyang huling habilin.

Kinatigan din ng hukuman ang mga "binding evidence" na inihain ni Ibuna sa korte, kabilang ang declaration of trust, special power of attorney at health care directive ni Arrroyo.

Kahapon, pinatunayan ng civil registrar ng Quezon City na walang bisa ang kasal ng namayapang kongresista kay Aleli.

Sa testimoniya ni civil registrar Ramon Matabang, inihayag nito na hindi naka-rehistro sa kanilang tanggapan ang annulment ng kasal ng mambabatas sa una nitong asawa bago ito nagpakasal kay Aleli.

Dahil dito, maituturing umanong "null and void" ang kasal ng dalawa.

Pero sa panig ng Aleli, iginiit ng abogada nitong si Atty. Lorna Kapunan na posibleng sa ibang lugar naiparehistro ang annulment.

Sa katunayan, nakakuha pa umano ng valid marriage license si Aleli at Iggy Arroyo noong 1994.