P-NoyIpinag-utos ngayon ni Pangulong Noynoy Aquino ang reloading ng P1,200 sa smart cards ng mga benepisaryo ng Pantawid Pasada Program ng pamahalaan.

Nasa 100,000 tsuper/operators ng pampasaherong dyipni ang makikinabang sa nasabing programa para maibsan ang sunud-sunod na pagtataas sa presyo ng produktong petrolyo.

Sinabi ni Presidential Spokesman Edwin Lacierda, nasa P200 million ang inilaan ng gobyerno para sa programa na pangungunahan ng Department of Energy (DoE).

Ayon kay Lacierda, aasahan din ang diskuwento sa presyo ng mga spare parts tulad ng baterya at gulong kapag naisaayos ang kasunduan ng mga kooperatiba at manufacturers.

Sa ngayon hindi masabi ni Lacierda kung tuloy pa ang dialogue ng Pangulo at transport groups na una nang inianunsyo mismo ng chief executive.

Ang mahalaga umano ang ginagawan ng gobyerno ng paraan para maresolba ang problema ng mga nasa transport sector.

“Inatasan po ni Presidente Aquino ang DOE na magbigay ng P1,200 reload para sa 100,000 benepisyaryo ng Pantawid Pasada Program. Para po ito maibsan ang epekto ng napipintong pagtataas ng presyo ng langis na mangyayari ngayong gabi,” ani Lacierda.

“Sa tulong din po ng Office of Transport Cooperatives sa ilalim ng DOTC, at ng Philippine International Trading Corp. sa ilalim ng DTI, pinatibay ang ugnayan sa pagitan ng mga kooperatiba at manufacturer ng gulong, baterya, at iba pang spare parts. Maaari pong makakuha ng tax exemption ang mga coop, maliban pa sa dealers' discount; direkta nitong mapapamura ang gastusin para sa maintenance ng mga sasakyan ng ating mga operator at tsuper ng jeep, bus, AUV, at taxi. Bukas po mismo ay maghaharap na ang mga kooperatiba at manufacturer upang magsimula ng pag-order ng mga kagamitan.”