Suspect Allan RobesTumanggi ngayon ang National Bureau of Investigation (NBI) na maki-alam sa kaso ng pagpatay sa negosyanteng si Noel Orate Sr., ang dating kinakasama ni ex-Quezon City Rep. Nanette Daza.

Sa isang panayam, nilinaw ni NBI deputy director Edmond Arugay na bagama't natanggap nila ang kahilingan ng pamilya ng biktima para sa isang reinvestigation, mangangailangan umano sila ng order mula sa korte o sa Department of Justice para ito ay gawin.

Binanggit pa ng opisyal na bilang palisiya umano ng kanilang kagawaran, hindi sila nakikialam sa isang kaso na nakabinbin na sa korte.

Maalala na noong Pebrero 10, binaril sa loob ng bahay ni Cong. Daza si Orate ng mismong manugang ng mambabatas na si Bulacan provincial board member Allan Robes.

Taliwas sa iginigiit ng pamilya ng biktima, kasong homicide ang isinampa laban kay Robes sa Quezon City Regional Trial Court.

Tiniyak naman ng Philippine National Police (PNP) na walang whitewash sa ginawa nilang imbestigasyon kaugnay sa pagkamatay ng negosyante.

Ayon kay QCPD-Criminal Investigation and Detection Unit head C/Insp. Rodel Marcelo, nagkaroon aniya ng "fairness and prudence" ang kanilang mga imbestigador sa paghawak sa kaso.

Kasabay nito, inahayag ng opisyal na ginagalang nila ang pasya ng pamilya ng biktima ng dumulog sa NBI para sa reinvestigation ng kaso.

Nagawa namang makalaya ng suspek matapos makapaglagak ng piyansa.

Kahapon, naihatid na sa kaniyang huling hantungan ang biktima.