Corona resignMariing pinabulaanan ng Malacañang ang kumalat na mga report na umano'y pinakikilos nito ang mga local government units para pilitin si Supreme Court Chief Justice Renato Corona na mag-resign na lamang sa gitna ng kinakaharap nitong impeachment case.

Sa isang panayam, tiniyak ni deputy presidential spokesperson Abigail Valte na maglalabas ng opisyal na pahayag ang gobyerno kung totoo mang mayroon kagayang kautusan.

Pero binigyang diin ni Valte, pawang espekulasyon lamang ang nasabing mga report ay walang katotohanan.

Ang pahayag ng kalihim ay bilang reaksyon sa kumakalat na balita kaugnay sa pagkilos umano ng mga “political operators” ng administrasyon para himukin ang mga local chief executives na magsagawa ng malawakang mga anti-Corona rallies.

Lumabas pa sa mga reports na isasabay umano ang nasabing kilos-protesta sa Pebrero 25, kasabay ng anibersaryo ng Edsa People Power I Revolution.

Samantala, nilinaw na rin ng Malacañang na wala ring problema sa kanilang panig kung dadami pa ang magra-rally pabor kay Corona sa mga darating na araw.

Magugunitang sa darating na Pebrero 28, may grand evangelization mission ang Iglesia Ni Cristo (INC) na sinasabing rally bilang suporta kay Corona.

Ayon kay Valte, sa ngayon ay wala naman silang impormasyon na magkakaroon ng ganitong pagkilos pabor sa impeached chief justice.

“Ay wala po akong impormasyon kung meron pong---kung sakaling meron po mang mangyayaring ganyan,” ani Valte.