Nonito Donaire Jr.SAN ANTONIO, Texas - Aminado si bagong 4th-division world champion Nonito Donaire na nahirapan ito sa laban kay former WBO super bantamweight champion Wilfredo Vazquez Jr.

Ilang minuto pagkatapos ianunsyo ni Michael Buffer ang panalo ni Donaire via split decision, ipinakita sa publiko ng Filipino boxer ang dumudugo nitong kaliwang kamay.

Ayon kay Donaire, natamo nito ang injury sa kalagitnaan ng second round.

Pagsapit aniya ng Round 4, nahirapan na siyang gamitin ang napinsalang kamao.

Sinabi pa ng tinaguriang "The Filipino Flash" na ang pagpupursige nito na maiuwi para sa mga kababayan ang karangalan, ang siyang nagbigay lakas sa kaniya para tapusin ang laban.

Batay scorecards, nakuha ni Vazquez ang 115-112 na iskor habang nasungkit naman ni Donaire ang 117-110 at 117-110 para maiuwi ang bagong korona via split decision.

Una rito, hinawakan ng tinaguriang "The Filipino Flash" ang WBC at WBO bantamweight belts, interim WBA super flyweight at IBF flyweight titles.

Samantala, labis na ikinatuwa ng mga kababayan sa General Santos City ang panalo ni Donaire.

Wala ring mapagsidlan ng tuwa ang mga kaanak nito sa lungsod lalo na ng i-anunsyo ang panalo nito.

Kasabay nito, umaasa ang ang pamilya Donaire na makabisita si Nonito o Junjun sa GenSan para makausap ang ito.