Bombo James LicuananPursigido ang gobyerno na maaresto ang mastermind sa tangkang pagpatay sa chief of reporters at "Zonalibre" program anchor ng Bombo Cagayan de Oro na si Bombo James Licuanan.

Nitong nakaraang araw sumuko ang suspek na si Baldomero Namanama Pajo sa pamamagitan ni commanding officer Lt. Col. Romeo Gapuz ng 403rd Brigade, Philippine Army.

Sinabi sa Bombo Radyo ni DILG Sec. Jesse Robredo, hindi natatapos sa pagsuko ng suspek ang kanilang trabaho at dapat maiharap sa hustisya ang utak ng krimen.

Ayon kay Robredo, magpapatuloy ang malalimang imbestigasyon hanggang sa tuluyang makamit ang hustisya para kay Bombo James.

Sa panig naman ni Licuanan, itinuring niya itong malaking tagumpay upang magbigay daan sa pagkamit ng hustisya sa kanyang sinapit.

Umaasa rin ito na agad na susunod na mahuli ang iba pang suspek upang managot sa ginawa nila noong Nobyembre 24, 2011.

Una rito, pauwi na sana sa kanilang bahay si Licuanan mula sa kanyang programa, subalit tinambangan ito ilang metro lamang ang layo sa himpilan ng radyo na naging dahilan upang tamaan siya sa puwitan na tumagos ang bala sa kanyang tiyan.