Baguio CityBAGUIO CITY - Bumagsak na sa 10.4 degrees Celsius ang tindi ng lamig sa summer capital of the Philippines.

Ito ay base sa pinakamababang temperatura na naitala ng Pagasa kaninang madaling araw.

Ito na ang pinakamalamig na klima na naramdaman sa lungsod ng Baguio  sa pagsisimula ng taong 2012, at posible pang titindi ito sa mga susunod na araw.

Una rito, ilang pananim na gulay at bulaklak ang naapektuhan ng frost bite sa iba't ibang bahagi ng lalawigan ng Benguet dahil sa pagbaba ng temperatura.

Batay sa kasaysayan ang pinakamababang temperatura na naitala sa city of pines ay umabot sa 6.3 degrees Celsius noong taong 1961.

Ang malamig na klima ang isa sa mga dinarayo ng mga turista  sa  lungsod ng Baguio.

Nitong nakaraang araw nagpahayag ng pangamba ang ilang nagtatanim ng bulaklak.

Sa panayam ng Bombo Radyo Baguio kay Erlinda Gayos, presidente ng Flower Marker Vendors sa Munisipyo ng La Trinidad, Benguet sinabi nito na hindi lamang ang vegetable industry ng Benguet ang apektado ng frost  bite ngunit pati na rin ang kanilang mga pananim na bulaklak.

Ang frost bite ay nangyayari kung bumababa ang temperatura ng isang lugar ng 10 degree Celsius pababa.

Noong January 26, 2012 ay umabot na sa 11.6 degree Celcius ang pinakamalamig na naitala ng Pagasa sa syudad ng Baguio.

Ang lalawigan ng Benguet ang isa sa mga pangunahing supplier ng mga bulaklak sa Metro Manila at sa iba pang panig ng lugar dito sa bansa.

Ani Gayos, matagal at nahihirapang bumuka ang ilang mga pananim nilang bulaklak gaya ng rosas dahil sa sobrang lamig.

Sa ngayon sapat pa naman ang kanilang pananim para sa pagdiriwang ng Panagbenga 2012 at araw ng mga puso sa buwan ng Pebrero ngayong taon.

Marami na ang nagpapareserba at umoorder ng bulaklak para sa nasabing mga okasyon.