Inaasahan ilalabas ngayong araw ang desisyon ng investigating body laban kay Presidential Adviser on Political Affairs Ronald Llamas.

Mismong si Executive Sec. Jojo Ochoa ang nanguna sa imbestigasyon kay Llamas matapos maaktuhang bumibili ng piniratang DVDs.

Sinabi ni Deputy Presidential Spokesperson Abigail Valte, tinapos na kahapon ang imbestigasyon at nagsumite ng kaukulang rekomendasyon hinggil sa ipapataw na parusa kay Llamas.

Ayon kay Valte, anumang desisyon ay ibabatay sa reklamo, sa kasagutan ni Llamas at sa mga nakalap na ebidensya.

Ligtas naman si Llamas mula sa pagkakasibak sa puwesto dahil mismong si Pangulong Noynoy Aquino na ang nagsabing nananatili ang kanyang ‘trust and confidence’ sa kontrobersyal na opisyal.

Si Llamas ay isa sa mga sinasabing ‘kabarilan’ ng Pangulong Aquino.

“The decision will be based on the allegations set out against Secretary Llamas as well as his answer, and any other pieces of evidence that may have been adduced during the investigation proceedings,” ani Valte.