Itinuturing ngayon ni Puerto Princesa Mayor Edward Hagedorn na malaking hamon ang pagbuhos ng maraming mga turista araw-araw matapos na maideklarang kabilang sa nanalo ang  Puerto Princesa Underground River (PPUR) sa New7Wonders of Nature.

Sa panayam ng Bombo Radyo kay Hagedorn tinawag niyang "grabe" ngayon ang inaaning interes mula sa mga turista sa kanilang lugar at hindi na sila magkaundagaga sa pag-aasikaso sa mga gagawin.

Dahil dito nakatakda silang magpatawag ng special tourism summit sa susunod sa Pebrero 11, 2012 upang tipunin ang mga stakeholders para makahanap ng sulusyon kung paano mahaharap ang pagdating pa ng maraming mga turista.

"Grabe po nagkaroon na kami ng problema sa dami ng dumarating na bisita, although this is a welcome problem pero kailangan pa rin ma-address natin kaya we're calling for a special tourism summit sa local stakeholders sa Puerto Princesa sa February 11 para talaga pag-usapan ang pagharap dito sa bagong challenges sa pag-accomodate dito sa thousands and thousands of visitors coming in everyday," ani Hagedorn.

Kung maaalala ang 8.2 kilometer underground river sa Palawan ay pormal na kinilala noong nakaraang linggo bilang bahagi ng New7Wonders of Nature kung saan tinawag pa ito ng mga organizers bilang "masterpiece of nature."

Sa darating na buwan ng Abril ay magkakaroon ng grand celebration na isasagawa naman sa Metro Manila.

Sinabi na rin ng Department of Tourism (DoT) Region 4, na nagpupursige sila ngayon para lalo pang mapadali ang pagbiyahe ng mga turista papuntang Palawan.

Ilan sa pinagkakaabalahan ng DoT ang pagsasaayos ng booking system papuntang Palawan kung saan hangad nilang gawin itong centralized.

Balak din nilang dagdagan ang mga public rest rooms papuntang Puerto Princesa at mga information kiosk para mapadali ang pamamasyal.

Sa ngayon dalawa pa lamang ang kinumpirmang kasama sa New7Wonders of Nature at ito nga ay ang PPUR at Jeju Island.

Ang lima pang iba na kasama sa provisional winners ay ang Amazon, Halong Bay, Iguazu Falls, Komodo at Table Mountain.