Pinalawig ng Court of Appeals (CA) sa loob ng anim na buwan ang freeze order sa ilang mga bank accounts ng mga hinihinalang miyembro at financier ng grupong Jemaah Islamiyah.

Sa 14 na pahinang resolusyon na sinulat ni Associate Justice Mariflor Punzalan Castillo, inaprubahan ng CA First Division ang ex-parte petition na inihain ng Anti-Money Laundering Council (AMLC) na palawigin ang freeze order laban sa mga account at asset na nakapangalan kina Eduard Guerra alyas Abraham Yap Alonto; Jocelyn Guerra; Al Nissah General Merchant, Beauty Rich Trading, Sharif Interior at EJ and P Builders.

Saklaw umano ng freeze order ang mga account ng mga respondent sa Banco de Oro, Bank of the Philippine Islands, Land Bank of the Philippines, Maybank, Metrobank at Rizal Commercial Banking Corporation.

“We cannot sustain petitioners’ argument that it does not matter whether or not the funds arose from a regular or good faith transaction as long as the same came from illegitimate activities,” nakasaad sa resolusyon.

Gayunman, binawi ng gobyerno ang naunang freeze order sa mga account ni Allan Joseph Chan makaraan nitong makumbinsi ang gobyerno na siya ay lehitimong negosyante.

Ayon sa AMLC, sina Edward at Jocelyn Guerra ay mga pangunahing facilitator ng JI.

Inaakusahan din ng gobyerno si Edward na nahaharap sa kasong murder, destructive arson at robbery na nagpondo sa Moro Islamic Liberation Front (MILF) para makabili at makapagpuslit sa Pilipinas ng mga armas at bala mula sa North Korea at iba pang bahagi ng East Asia.