Acosta and AquinoMaituturing na welcome development sa Malacañang ang desisyon ng Sandiganbayan na patawan ng 90-day suspension si Presidential Adviser on Environmental Concerns Neric Acosta.

Magugunitang si Acosta na kasalukuyang administrator din ng Laguna Lake Development Authority (LLDA) ay sinampahan ng kaso kaugnay sa sinasabing maling paggamit sa kanyang Priority Development Assistance Fund (PDAF) na nagkakahalaga ng P2.5 million noong March 3, 2001 noong siya pa ang kongresista ng Bukidnon.

Liban sa nabanggit na kaso, nahaharap din si Acosta sa kasong graft dahil sa umano'y paglipat ng P2.5 na pondo sa Bukidnon Integrated Network of Home Industries (BINHI) Inc., isang pribadong kooperatiba at P5.5 million naman sa Bukidnon Vegetable Producers Cooperative (BVPC), na isa ring private entity.

Sinasabing ang  kanyang ina na si dating Manolo Fortich Mayor Socorro Acosta ay  miyembro at director ng BVPC habang ang tiyahin na si Ma. Nemia Bornidor naman ay miyembro ng board ng BINHI.

Sinabi naman ngayon ni Deputy Presidential Spokesperson Abigail Valte, tinanggap ng Office of the President kahapon ang nasabing desisyon at nakatakdang ipatutupad sa lalong madaling panahon,.

Ayon kay Valte, nagpahayag na rin si Acosta sa Palasyo na kanyang susundin ang ipinataw na suspension sa kanya ng korte.

Magugunitang nagmamalaki pa noon si Acosta sa kanyang sagot sa Sandiganbayan na kung siya’y isususpinde, para na ring sinuspinde umano ang Pangulong Noynoy Aquino.