Neric AcostaIpinag-utos na ng Sandiganbayan (SB) 4th division ang pagsuspinde ng 90 araw kay Presidential Adviser on Environmental Concerns Neric Acosta na nahaharap sa kasong katiwalian.

Si Secretary Acosta na kasalukuyang administrator din ng Laguna Lake Development Authority (LLDA) ay sinampahan ng kaso kaugnay sa sinasabing maling paggamit sa kanyang Priority Development Assistance Fund (PDAF) na nagkakahalaga ng P2.5 million noong March 3, 2001 noong siya pa ang kongresista ng Bukidnon.

Una nang kinasuhan si Acosta ng anti-corruption group na Bukidnon Crusade Against Graft and Corruption kung saan inakusahan ito na ginamit ang kaniyang pork barrel funds sa maanomalyang pagbili ng mga tunnel dryers pabor sa isang kompaniya kung saan tumatayo ring incorporators ang kanyang ina na si dating Manolo Fortich Mayor Socorro Acosta at tiyahin na si Ma. Nemia Bornidor.

Liban sa nabanggit na kaso, nahaharap din si Acosta sa kasong graft dahil sa umano'y paglipat ng P2.5 na pondo sa Bukidnon Integrated Network of Home Industries (BINHI) Inc., isang pribadong kooperatiba at P5.5 million naman sa Bukidnon Vegetable Producers Cooperative (BVPC), na isa ring private entity.

Sinasabing si Mrs. Acosta ay  miyembro at director ng BVPC habang si Bornidor naman ay miyembro ng board ng BINHI.

Bago ang Sandiganbayan decision, hiniling na rin noong nakaraang taon ng mga government prosecutors ang pagsuspinde kay Acosta habang dinidinig ang kaso, subalit giit nito na hindi siya sakop ng utos ng korte dahil naitalaga siya bilang presidential appointee.

Kung maaalala natalo ang kalihim sa pagkandidato niya bilang senador noong May 2010 elections.