Spratly IslandsNakahanda umanong pumagitna ang Russian government sa territorial disputes na namamagitan sa Pilipinas at China sa West Philippine Sea.

Sa isang pahayag, sinabi ni Russian Ambassador to the Philippines Nikolav Kudashev na bukas ang kanilang gobyerno na magbigay ng "advice" kaugnay sa isyu, sakaling hihilingin ito ng dalawang bansa.

Nilinaw din ng opisyal na parehong kaibigan umano ng Russia ang China at Pilipinas kung kaya't ayaw nilang maki-alam sa usapin.

Noong Martes, dumaong sa Pier 15 sa lungsod ng Maynila ang tatlong Russian Navy ships para sa tatlong araw na "friendly visit".

Kabilang sa Russian fleet ang anti-submarine destroyer na “Admiral Panteleyev”.

Umiinit ang tensyon ng Pilipinas at China dahil sa pinag-aagawang mga isla sa West Philippine Sea at pinapangambahang madagdagan ito sa pagpaparamdam ng Estados Unidos.

Pero sinabi sa Bombo Radyo ni Deputy Presidential Spokesperson Abigail Valte, na wala silang nakikitang dahilan para lumala ang tensyon sa Spratlys dahil wala namang masama kung palakasin ng Pilipinas ang kanyang militar.

Ayon kay Valte, hindi dapat mag-alala ang mga makakaliwang grupo na anti-US dahil nagsisimula pa lamang ang negosasyon at wala pang pinipirmahang deal.

Maliban umano sa US, iba’t ibang bansa pa ang kinakausap ng Pilipinas para ma-upgrade ang defense capability.

“We believe hindi naman po ito magkakaroon ng masama epekto. We believe it is understandable for a country like us to upgrade its military,” ani Valte.