Vicente EmanoCAGAYAN DE ORO CITY - Tiniyak ni Cagayan de Oro City Mayor Vicente Emano na kanyang haharapin ang imbestigasyon na iniutos ng Malacañang kaugnay sa reklamo ng grupo ng mga private citizens sa lungsod.

Ginawa ng alkalde ang pahayag matapos kumpirmahin ng Palasyo na umuusad na ang imbestigasyon sa alegasyon na umano'y pagpapabaya ni  Emano sa nangyaring trahedya sa Cagayan de Oro na ikinasawi ng daan-daang katao.

Sinabi ni Mayor Emano sa Bombo Radyo Cagayan de Oro, inaasikaso na ng kanyang mga legal counsel ang kasagutan mula sa abiso na natanggap ng kanyang opisina mula sa Malacañang.

Muling pinaninindigan ng alkalde na hindi siya nagpabaya sa nangyaring kalamidad sa lungsod bagkus ay kanyang tinututukan ang pagbibigay ng tulong at iba pang mga pangangailangan ng mga pamilyang nasalanta ng matinding pagbaha.

Hindi rin aniya tama na sa kanya lahat ibunton ang sisi sa naturang trahedya.

Dagdag pa ng opisyal, ipapaubaya na niya sa Malacañang ang pagdesisyon sa oras na maisumite na ng kanyang kampo ang mga dokumento na magpapatunay na hindi siya nagpapabaya sa kanyang tungkulin at obligasyon.