Idudulog na ng minority bloc sa liderato ng Kamara ang isyu ng palaging kawalan nila ng korum, mula ng magsimula ang impeachment case ni Supreme Court Chief Justice Renato Corona.

Iginiit ngayon ni House Minority Leader Danilo Suarez, hindi maaring gawing alibi ng kanilang mga kapwa kongresista ang impeachment dahil mayorya umano sa mga ito ay wala namang papel sa proceedings.

Pinuna pa ni Suarez na simula ng mag-umpisa ang impeacment trial noong January 16, naburo na umano ang trabaho ng Kamara dahil sa problema sa attendance.

“We never had a quorum since we open last January 16 when the impeachment trial started. This is totally counter-productive,” giit ni Suarez.

Sa naunang pahayag ni Albay Rep. Edcel Lagman, hinimok din nito ang Pangulong Benigno Aquino III na pagsabihan ang mga kaalyado nito sa mababang kapulungan na magtrabaho at tugunan ang mga isyung kinakaharap ng simpleng mamamayan.

“The Aquino administration must meaningfully and immediately address these small concerns of small Filipinos rather than divert its time, passion and resources to an agenda of prosecution which will not uplift and empower the greater number,” ani Lagman.

Kabilang sa mga mahahalagang panukalang batas na nakabitin ngayon sa Kongreso ay ang kontrobersiyal na Reproductive Health bill at Freedom of Information bill.