Sen. Lito LapidDahil wala pa rin si Sen. Miriam Defensor-Santiago na nagpapasigla sa nakaraang pagdinig, mistulang humalili muna si Sen. Lito Lapid na nagbigay kulay sa paglilitis.

Sa kauna-unahang pagkakataon kasi, tumayo si Lapid at sa halip na ang testigo ang tanungin ay si Rep. Rey Umali ng prosekusyon ang tinanong.

Bahagyang nagkalituhan pa dahil, hindi malaman ni Senate President Juan Ponce-Enrile na siyang presiding officer kung kanino inuukol ni Lapid ang kanyang katanungan na “Ano ang kaibahan ng loan sa cash advance ni Corona?”

Naging mahaba kasi ang diskusyon ng depensa at prosekusyon sa umano'y pekeng P11 million loan ng misis ng punong mahistrado sa Basa-Guidote Enterprises Inc., na nakasaad sa kanyang statement of assets, liabilities and net worth (SALN).

Kapansin-pansing ang seryosong paglilitis ay nahaluan ng komedya nang mismong si Lapid ang nagkomento kung bakit nagtawanan ang kanyang mga kasamahang senador sa kanyang pagtayo para magtanong.

Pati ang mga nanonood sa gallery ng senado ay halos maghiyawan nang tumayo ang senador.

Halos araw-araw naman na dumadalo si Lapid sa paglilitis ngunit ngayon lamang ito tumayo at nakibahagi sa paglilitis.