You are here: HomeRegional NewsOther Dialect

KALIBO, AKLAN --- Arestado ro sangka turistang Chinese matapos nga magpanakaw sigon it mga eambong sa sangka boutique sa Brgy. Balabag sa isla it Boracay. 

 

Ro suspek hay ginkilaeang si Chunna Liu, 36, taga-China ag nagabakasyon eamang sa isla. 

 

Base sa report it Boracay Tourist Assistance Center (BTAC), nakit-an sa CCTV it nasambitang boutique ro pagbutang it suspek sa anang bag it baligyang eambong nga nagabalor it P1,900 ag sangka souvenir t-shirt nga may presyong P1,600. 

 

Kat sitahon it saleslady hay ginhampak sigon raya it turista gamit ro anang bag ag nagpakamaeo. 

 

Sa makaron hay nakakulong eon ro nasambitang turista.

Backpack bawae sa Ati-Atihan festival

Tuesday, 10 January 2017 19:27

KALIBO, AKLAN --- Hugot nga ginabawae ro pagdaea it backpack sa mga makisadya sa selebrasyon it Kalibo Sto. Nino Ati-Atihan Festival. 

 

Suno kay SPO1 Nida Gregas, public information officer it Aklan Police Provincial Office (APPO) nga nagpaguwa sigon it mando ro Police Regional Office (PRO-6) nga likawan ro pagdaea it backpack bilang kaparte it high-security measures. 

 

Masami sigon raya nga ginagamit para butangan it mga bomba kamana maan apisar nga uwa it paeag sa seguridad ukon pagpanabotahe sa selebrasyon hay gusto eamang it kapulisan nga masigurado ro seguridad. 

 

Gin-engganyo man kara ro publiko nga insigidang i-report ro mga kamaea-maeahang butang. 

 

Samtang, bawae man ro drones sa ere mag-eowas eon lang kon may nagakaigo nga security clearance halin sa mga otoridad. 

 

Igapatuman man ro gun ban ag ro pagdaea it deadly weapons sa festival. 

 

Nasayuran nga kapin sa 250 nga pulis mag-eowas pa sa mga force multipliers kaparehas it mga soldado ag CAFGU it Armed Forces of the Philippines ro insigidang ginpaeapta sa banwa it kalibo.

KALIBO, AKLAN --- Patay ro sangka drug pusher matapos sigon nga magsukoe sa mga pulis sa gin patigayun nga buy bust operation sa Sitio Logutan, Barangay Manoc-Manoc sa isla itBoracay. 
Gin kilaea ro napatay nga suspek nga si Raffy Diamante, 35, residente it Guimaras Iloilo. 
Base sa imbestigasyon, mismong hepe it Boracay Tourist Assistance Center (BTAC) nga si Senior Inspector Jess Baylon ro nakabaril kay Diamante matapos nga naghanang gumabot it gina sukbit nga kalibre .38 nga baril.
Nagpakuno-kuno sigon si Senior Inspector Baylon nga sangka poseur-buyer agud madakpan ro suspek nga haeos tatlong buean eon nga gina subaybayan it mga otoridad bangud sa maeapnagon nga pagbaligya it shabu sa isla.
Dead-on-the-spot ro suspek matapos nga makaangkon it pitong igu it bala sa magkaeain-eain nga parte it anang eawas matapos mga magdueomugan sanda sa sangka mangrove plantation sa lugar. 
Nabo-oe kay Diamante ro waeong sachets it shabu, .38 kalibre nga baril nga kargado itlimang mga bala. 
Nasayuran nga raya eon ro pangaywang drug suspek nga napatay sa banwa it Malay.

KALIBO, AKLAN --- Pormal eon nga ginbuksan ro bag-ong Kalibo-Numancia Bridge matapos ro ginpatigayon nga simpleng seremonya.
Nagabalor it P370-million ro nasambit nga tulay nga ginatantiya nga 450-lineal meter nga two-lane ag 7.3 meter ro eapad nga nagakonektar sa banwa it Kalibo ag banwa it Numancia.
Ro nasambit nga proyekto hay sambilog sa mga priority infrastructure projects sa Aklan nga nagatuyo nga mapahagan-hagan ro daeagan it trapiko eabi eon sa tiempo it selebrasyon it Kalibo Sto. Nino Ati-Atihan Festival ag masoehay nga pagbiyahe paagto sa mga tourist spots partikular sa isla it Boracay.
Nauna eon nga ginpahayag ni Aklan District Engineer Noel Fuentebella it Department of Public Works and Highways (DPWH)-Aklan nga nadelay ro construc-tion it tulay it pilang buean kasunod it negosasyon sa mga pribadong tag-ana it eugta sa Brgy. Bulwang, NUmancia ag Poblacion Kalibo nga naapektuhan it road right of way.
Ro dating naga-eksister nga tulay hay pagabuksan sa one-way traffic halin sa Numancia paagto sa Kalibo samtang ro bag-ong tulay hay paga-agihan it mga saeakyan nga paagto sa western side nga mga banwa.
Ro seremonya sa pagbukas it bag-ong tulay hay gintambungan it mga opisyal it probinsiya.
KALIBO, AKLAN --- Haeos punuan eon ro tanan nga mga hotels, lodging ag pension houses sa Kalibo sang dominggo antes ro Ati-Atihan festival 2017. 
 
Suno kay Albert Meñez, chairman it festival organizer nga Kalibo Sto. Niño Ati-Atihan Foundation, Inc. (Kasafi) nga maabo eon sigon ro nagpa-advance booking nga mga bisita ag kaabuan hay mga turista ag balikbayan. 
 
Gin-engganyo man kara ro mga residente nga makaangkon it “home stay” ukon paupahan ro mga bakanteng kwarto sa andang baeay para sa mga turista nga uwa it maistaran.  
 
Sa pihak nga parte, pilang mga hotels ag resorts sigon sa isla it Boracay ro nagpatigayon it one-day tour package  sa andang mga bisita kapin eon ro mga foreign tourists agud masaksihan sa sueod it sang adlaw ro makolor ag masadyang festival nga ginakabig nga “Mother of all Philippine Festivals”.
 
Samtang, nagaeaum si Meñez nga magabuhos pa ro mga turista sa festival bangud sa pag-abot it mga gwapahong kandidata it Miss Universe.  
 

KALIBO, AKLAN --- Kapin sa 2,000 nga mga pulis ro ipa-eapta sa isla it Boracay agud masiguro ro kaeowasan it mga delegado it Association of Southeast Asian Nations (ASEAN) Summit 2017 sa Pebrero 11 hasta Marso 2. 

 

Suno kay SPO1 Nida Gregas, public information officer it Aklan Police Provincial Office (APPO) haom eon sigon sanda sa ginaeaumang pagbuhos it mga heads of states kamana man ro foreign ag local participants. 

 

Nagagana eon sigon ro ginbilog nga Task Group Boracay Asean 2017 para sa security preparations. 

 

Samtang, hugot nga ginapatuman ro one-entry-one-exit policy agud ma-monitor ro mga nagasueod ag nagaguwa nga motorbanca ukon iba pang sakayang pandagat sa isla. 

 

Ginpahayag dugang ni SPO1 Gregas nga magiging host ro Boracay sa ap-at nga magkaseperadong mga pueong. 

 

Nasayuran nga ro ASEAN summit hay kadungan sa golden anniversary it organisasyon nga may tema sa makaron nga “Partnering for Change. Engaging the World.”

KALIBO, AKLAN --- Makisadya sa masangag ag makolor nga Kalibo Sto. Nino Ati-Atihan Festival ro mga gwapahong kandidata it Miss Universe sa Enero 14 antes magpadueong sa isla it Boracay. 

 

Suno kay SPO1 Nida Gregas, public information officer it Aklan Police Provincial Office nga makaangkon it seperado nga deployment it mga pulis sa Kalibo para sa festival ag Boracay para sa pre-pageant activities it 65th Miss Universe pageant antes ro coronation night sa Enero 30 sa Mall of Asia Arena.

 

Ginaeauman nga magabuhos sigon sa Boracay ro kaibahan nga mga pamilya it kapin sa 90 nga mga kandidata. 

 

Nasayuran nga ro pagbisita it mga kandidata it Miss Universe hay kadungan sa selebrasyon it Kalibo Sto. Nino Ati-Atihan Festival nga ginakabig nga “Mother of All Philippine Festivals.”

KALIBO, AKLAN --- Ginaeauman nga kapin pang magabaskog ro industriya it turismo sa isla it Boracay sa nakataeanang pagbisita it mga kandidata it Miss Universe 2017 sa Enero 14. 

 

Suno sa Malay Tourism Office, ro pag-host it Pilipinas sa pinaka-prestihiyosong pageant sa bilog nga kalibutan hay magiging daan agud mas pang makilaea ro isla it Boracay. 

 

Sambilog ro Boracay sa mga tourist sites nga pagahiwatan it pila ka mga segments it pageant. 

 

Haum eon man sigon ro mga produkto ag serbisyo sa isla sa nasambitang event bangud pilang beses eon raya nag-host it mga international events kaparehas it ministerial meetings it Association of Southeast Asian Nations (ASEAN) ag pre-pageant activities it Miss Earth 2016. 

 

Nasayuran nga ro pagbisita it mga kandidata it Miss Universe hay kadungan sa selebrasyon it Kalibo Sto. Nino Ati-Atihan Festival nga ginakabig nga “Mother of All Philippine Festivals.”

KALIBO, AKLAN --- Bangud sa mabaskog nga hampak it humbak, stranded sa makaron ro kapin sa sang libong pasahero sa Caticlan jetty port sa Malay, Aklan. 

 

Pila sa mga pasahero ro nagpaabot it reklamo sa Bombo Radyo Kalibo bangud haeos daywang adlaw eon sigon sandang stranded sa nasambitang pantalan. 

 

Kaabuan sa mga pasahero hay halin sa Iloilo ag pabalik it Maynila. 

 

Mag-eowas sigon nga uwa eon sanda it kwarta ag pagkaon, nagapameligrong mawad-an pa sanda it trabaho. 

 

Ginatantyang 30 nga mga bus ro mahabang nakapila sa makaron sa pantalan ag haeos daywa eamang nga barko ro mahimong magdungka ag kon amat hay atrasado pa ro pag-abot. 

 

Samtang, ginklaro ni Lt. Edison Diaz, commander it Philippine Coast Guard (PCG)-Caticlan nga uwa it suspension sa biyahe it mga RoRo vessel apang limitado eamang sa tatlong bus ro mahimong isakay agud malikawan ro trahedya sa kadagatan. 

 

First come, first serve sigon ro ginapatuman nga patakaran sa pagpasakay it mga RoRo bus. 

 

Ginbasoe man it PCG ro mga bus companies sa padayon nga pagbaligya it mga ticket sa mga pasahero apisar nga nasayuran eon nanda ro sitwasyon sa mga pantalan sa makaron kon sa siin fully-booked eon ro mga barko. 

KALIBO, AKLAN --- Nanihan ro sangka 52-anyos nga eaeaki matapos nga angkiton it barakong baboy sa Brgy. Catmon, Altavas, Aklan. 

 

Haeos mawasak ro tu-o nga parte it buli it biktima nga ginkilaeang si Joreto Candelario, residente it nasambitang lugar kat angkiton it alagang baboy it andang kaeapit-baeay samtang naga-agi raya sa likod nga parte it baeay. 

 

Insigida raya nga nagpangayo it bulig kabangdanan nga naawat ro baboy. 

 

Suno sa biktima nga samtang nagapasueod sa trabaho hay nag-short cut raya sa likod nga aprte it andang kaeapit-baeay ag kat nag-agi sa baboy hay gulping gindakma ro anang buli. 

 

Matapos nga mahugasan ro nina hay insigida raya nga gindaea sa Aklan Provincial Hospital ag padayon nga nagapamayad sa makaron. 

Contact Us

  • Address: 2406 Nobel corner Edison Streets, Makati City Philippines
  • Tel: +(632) 843 0116
  • Fax: +(632) 843 0116
  • Email: This email address is being protected from spambots. You need JavaScript enabled to view it.