You are here: HomeRegional NewsOther Dialect

KALIBO, AKLAN --- Gin-istoryahan it mga netizens ro pag-facebook live it sangka babaye sa tunga it nagakasunog nandang baeay sa Sitio Hagdan, Brgy. Yapak sa isla it Boracay.

 

Sa nasambitang video, nagapanangison ro babaye samtang nagapangayo it bulig sa amat-amat nga pag-ugdaw it kaeayo sa andang baeay.

 

Maabo sa mga netizens ro nagkomento nga nahimo pa it babaye nga mag-facebook imbes nga magbulig nga maeowas ro iba pa nandang pagkabutang ukon ro kaugalingon nga kabuhi. 

 

Ginatantyang kapin sa P700,000 ro halit sa pagkasunog it tatlong baeay sa nasambitang lugar. 

 

Base sa report it Boracay Tourist Assistance Center (BTAC), naghalin ro kaeayo sa baeay ni Jonelyn delos Reyes, ag nadaeahig ro daywang iba pang kaeapit nga baeay nga ginapanag-iyahan it mga manghod nga sanday Joralyn Esto ag Anecito delos Reyes, Jr. 

 

Nagapadayon pa ro imbestigasyon it Bureau of Fire Protection (BFP)-Boracay sa kabangdanan it sunog.

KALIBO, AKLAN --- Ginpangunahan ni Asia's first grandmaster Eugene Torre ro pagbukas it tatlong adlaw nga National Open Chess Tournament Championship ag National Age Group Chess Championship sa sangka mall sa Kalibo, Aklan. 

Nagpakitang gilas si Torre sa mga nagpartisipar kat sumabak sa 10-chess board simultaneous exhibition. 

Nagtipon-tipon sa nasambitang tournament ro mga atleta halin sa nagkaeain-eain nga nasyon. 

Gin-eaygayan ni Torre ro mga batang atleta nga mangin positibo sa paghampang it chess ag sa kabuhi. 

Ro grandmaster hay nagpabilin sa banwa it Kalibo hasta sa natapos ro torneo.

KALIBO, AKLAN --- Nagapangatubang sa patong-patong nga kaso ro sangka eaeaki matapos nga ginreklamo it daywang tindero it pagpanutok it baril sa Makato, Aklan.

 

 Ginkilaea ni Police Senior Inspector Jayson Berciňa, hepe it Makato PNP ro mga biktimang sanday Ricky Bendecio, 32, it Brgy. Banago, Bacolod City ag Vic Nemiada, 36, it Brgy. Dangcalan, Malinao, Aklan.

 

Ginasugid nga gintutukan sigon it baril nga Gloc 17 Gen4 it suspek nga si Jelvin Maayon, 38, it Brgy. Agbalogo, Makato ro mga biktima sa inde matumod nga kabangdanan.

 

Sa ginpatigayong imbestigasyon, nadiskubreng ro baril nga ginagamit it suspek hay ginapanag-iyahan ni PO3 Rufino Donato, Jr., nga ginasugid nga gintakaw kat maaksidente sa banwa it Kalibo ko nagtaliwan nga dag-on.

KALIBO, AKLAN --- Patay ro sangka 15-anyos nga motorcycle rider samtang kritikal man ro kondisyon it anang angkas kat sumunggab ro ginamanehong motorsiklo sa naka-park nga multicab sa kilid it national highway sa Brgy. Laguinbanua West, Numancia, Aklan.

Nag-angkon it nina sa nagkaeain-eain nga parte it eawas ro driver ag angkas kara nga si Marnel Nicodemus, 18, parehong residente it Brgy. Camansi Sur it nasambitang barangay.

Base sa imbestigasyon it Traffic Section it Numancia PNP, ginabaybay it mga biktima ro nasambitang lugar kat sumunggab sanda sa multicab.

Naghalin sigon sa banwa it Kalibo ro mga raya ag may pagasueangon sa nasambitang lugar.

Ro aksidente padayon nga ginaimbestigahan it pulisya.

KALIBO, AKLAN --- Nasapwan nga nagapaeotaw-eotaw ro bangkay it sangka eaeaki nga sakop it Station 3 sa Brgy. Manoc-Manoc sa isla it Boracay.

 Ro biktima hay ginkilaeang si Rodel Macahilig, 25, residente it Tangalan, Aklan ag temporaryong naga-istar sa Sitio Manggayad, Brgy. Balabag sa nasambitang isla.

Suno sa Boracay Tourist Assistance Center (BTAC), ro bangkay hay nakit-ang nagapaeotaw-eotaw it mga beachgoers may 200 metros ro kaeayuon halin sa binit it baybayon.

Insigidang gindaea ro biktima sa sangka klinika, apang gindeklarang patay eon.

Uwa it nakit-ang nina ukon gaob sa eawas it biktima rason nga pagkaeomos ro nakit-ang kabangdanan it pagkamatay kara.

Eaeaki nasae-an nga manakaw binugbog, patay

Friday, 20 January 2017 06:41

KALIBO, AKLAN --- Uwa it kaeooy nga ginkabuligan nga bugbugon it grupo it mga kaeaeakinhan ro sangka eaeaki nga nasae-an nga motornapper sa C. Quimpo St. Kalibo, Aklan. 

 

Suno kay PO3 Vedasto Nabor IV, imbestigador it Kalibo PNP nga bangud sa kahilungon hay ginsakyan ag ginsusian it biktimang si Joseph Gallardo, residente it Sitio Himbis, Brgy. Lalab, Batan ro motorsiklong ginapanag-iyahan it suspek nga si Ramon Moises it Brgy. Andagao, Kalibo. 

 

Nasayuran sigon it biktima nga ana ro ginasakyang motorsiklo nga kaiping eamang sa motorsiklo it suspek. 

 

Kat makit-an hay insigidang gin-eapitan it grupo ni Moises si Gallardo ag gintik-eod kon sa siin tumama ro ueo sa matig-a nga butang. 

 

Nag-angkon raya it nina sa nagkaeain-eain nga parte it eawas. 

 

Haom sigon nga magpasaka it kaso ro pamilya it biktima kontra sa suspek nga eubus ro paghinoesoe sa anang nahimo.

KALIBO, AKLAN --- Uman nga gin buhi ni Aklan Representative Carlito Marquez ro proposisyon nga makaangkon it daywang distrito ro probinsiya it Aklan.
Suno sa kongresista nga nagdihon raya itHouse Bill 4670 sa 17th Congress ah nakataeanang isalang sa first reading.
Nagapati si Marquez nga makaeusot sa Kongreso ro nasambitang proposisyon apang, indi masiguro kun owa it maga baeabag kara sa oras nga makaabot sa Senado.
Tinotuyo sigon it 4670 nga mas pang mapaumwad ro probinsiya it AKlan bangud ro kada distrito ay makaangkon it kanya-kanyang pondo para sa andang mga proyekto.
Nasayuran nga sa nasambitang proposisyon, ro First Legislative District nga may unang 
297,318 census population hay gina eakipan it banwa it Kalibo, Libacao, Madalag, Banga, Altavas, Balete, Batan agNew Washington.
Samtang, sakop itSecond Legislative District ro mga banwa itLezo, Malinao, Makato, Tangalan, Ibajay, Nabas, Buruanga, Malay kaeakip eon ro isla it Boracay nga may unang 
277,505 census population.
Madumduman nga daywang beses eon nga gin hana nga himuong daywang distrito ro Aklan pinaagi sa HB 3860 ku 15th Congress ag HB 112 ku 16th Congress apang, owa nagmadinaeagon bangud gin harangan raya sa Senado.

KALIBO, AKLAN --- Gin-aresto ro sangka barangay chairman sa bisa it warrant of arrest bangud sa kasong pag-eabag sa Republic Act (RA) 7610 ukon two counts it Anti Child Abuse Law nga gin-isyu ni Judge Bienvinido Barrios it Branch 3, Regional Trial Court, Kalibo, Aklan. 

 

Suno kay PO3 Felizardo Navarra it Numancia PNP, gindakop si Barangay Chairman Alvin Nabor, 43-anyos, residente it Brgy. Laguinbanua West, Numancia, Aklan it gintingob nga pwersa it Criminal Investigation and Detection Group (CIDG), Numancia PNP ag Trackers Team it Aklan Police Provincial Office (APPO). 

 

Temporaryong napahilway ro suspek matapos nga nakadihon it piyansa nga tig-P80,000 ro kada isaea.

KALIBO, AKLAN --- Personal nga ginpasaeamatan it overseas Filipino worker (OFW) nga si Jessily Vega, 35-anyos it Numancia, Aklan ro Bombo Radyo Kalibo matapos nga eowas nga nakauli sa probinsya it Aklan. 

 

Nauna eon kara nga nagpabulig ro ina ni Jessily sa Bombo Radyo matapos nga uwa insigidang nakauli bisan nga paso eon ro anang daywang dag-on nga kontrata ag sa baylo hay ginpasa-pasa sa iba pang kapamilya it anang employer sa Saudi Arabia. 

 

Ginpahayag pa kara nga mag-eowas sa mga sampae, sipa ag pambugbog, ginhana pa sigon imaw nga himuslan ko igmanghod it employer. 

 

Bukon man sigon it kompleto ro ginata-o kanang sweldo ag may mga adlaw nga uwa imaw ginapakaon. 

 

Samtang, sa bulig gihapon it Bombo Radyo, nagpromisa ro Overseas Workers Welfare Administration (OWWA) regional office VI nga pagabuligan ro OFW sa idaeom it “Balik Pinas, Balik Hanapbuhay”, sangka programa it gobyerno para sa mga OFWs nga nagabalik sa nasyon.

KALIBO, AKLAN --- Ginatantyang P600,000 nga halaga it mga pagkabutang ro naugdaw it kaeayo matapos masunog ro daywang ka mga baeay ag partially damage ro sangka 3-storey apartment building sa Sitio Tulubhan, Brgy. Manoc-Manoc sa isla it Boracay. 

 

Suno kay FO3 Franklin Arubang it Bureau of Fire Protection (BFP)-Boracay nga base sa andang inisyal nga imbestigasyon, nag-umpisa ro sunog sa sambilog sa mga baeay nga human sa light materials. 

 

Totally burned ro daywang ka mga baeay nga parehong boarding house samtang partially damage ro nadaeahig nga aparment building kapin eon ro kwartong gina-ukopahan it sangka Korean national. 

 

Ro nasambitang building sigon ro nagserbeng fire wall ag nalikawan ro sambilog eoman nga mabahoe nga sunog sa isla kon sa siin maabong mga panimaeay ro human sa light materials ro nakahilira sa nasambitang lugar. 

 

Uwa man it naireport nga naninahan sa nag-eontad nga sunog. 

 

Presente pang ginaimbestigahan it BFP-Boracay ro kabangdanan it sunog.

Contact Us

  • Address: 2406 Nobel corner Edison Streets, Makati City Philippines
  • Tel: +(632) 843 0116
  • Fax: +(632) 843 0116
  • Email: This email address is being protected from spambots. You need JavaScript enabled to view it.