You are here: HomeRegional NewsBicolano


LEGAZPI CITY - Mismong si Department of Foreign Affairs an nagkumpirmar asin nagpahayag kan nagkakapira sa mga rason kun nata napili an Albay ngani na maghost sa nagkapirang dakolang event kan 2015 Asia-Pacific Economic Cooperation (APEC) Summit.


Segun ki DFA Deputy Director General Ma. Angelina M. Santa Catalina, na napili an Albay na pag kunduktahan kan nagkapira sa mga meeting kan APEC huli kan 'vitality asin dynamism' pag-abot sa development sa ibong kan manlaen laen na piligrong pigkakahampang kaini kabale na an bagyo, huma sa pagtuga kan bulkan Mayon, asin iba pang kalamidad.


An APEC Summit an saru sa pinaka dakolang event ngonyan na taon sa nacion asin digdi sa provincia nin Albay.


Sa Desyembre 8 asin 9 gigibuhon an sunod sunod na ministerial meeting na papangenotan man 2015 APEC Leaders Summit.


An APEC opening meeting an gigibuhon sa Legazpi Oriental Hotel asin an luxury Misibis Resort Hotel sa banwaan man Bacacay na papamayuhan man kan economic ministers of 21-member countries na aatinderan kan maabot sa un mil na iba pang mga opisyal gikan sa manlaen laen na nacion.
Sa prisente, nasa puga pugang training na an mga nasa lado AFP, PNP, Coast Guard, Navy asin Air Force para sa mahigot na seguredad na itatao kan mga Ini sa mga darakolang personaledad na mabisita sa provincia


Marurumduman na apwera sa enot nang dakolang kantidad na ipigtagama kan gobyerno sa sinambit ng dakolang aktibidad, naghurot pa ini nin dugang nin P6.3-M para sa dugang pang preparasyon.


Sa ibong na lado, padagos man an deliberasyon na pigsasagibo kan mga concerned officials pag abot sa planong pagdedeklarar nin suspension kan klase sa sinambit ng mga petsa para sa aktibidad sa bilog na provincia na ipig suhestyon ni Office of the Civil Defense (OCD) Bicol Reg.Dir.Raffy Alejandro asin Albay Provincial Preparatory Logistical Committee (APPLC).

Naga City- Dawa dae pa nakakabalik sa dati, pigsierto ni Camarines Norte Governor Edgardo Tallado na padikit-dikit na sindang nagkakaayos kan saiyang esposa si Mrs. Josefina Tallado.

 

Sa intrivista kan Bombo Radyo Naga ki Governor Edgardo Tallado, sinaysay kaini na maayos na sa ngunyan an kamugtakan nindang mag-agom sa tahaw kan saindang pinag-aagihan.

 

Sigon ki Tallado, nakakaturog na man suboot ini nin pakaray asin ayos na man an problema sa pag-ulatanan nindang duwa alagad dae pa arog kadto sa dati an saindang ibanan.

 

Alagad, piglinaw man kan opisyal na padagos an pagsisikap niya na maibwelta sa normal an gabos.

 

Apwera digdi, piglinaw man kan opisyal na padagos pa man an saindang kamawotan na dawa padikit-dikit maibwelta pa man niya sa dati an ibanan kan saiyang bilog na pamilya.

 

Liwat man na naghagad nin pag-intiendi an opisyal sa namamanwaan kan Camarines Norte na naimbwelto sa eskandalo huli sa saiyang nagin pagkakasala.

NAGA CITY-Sa ibong kan eskandalong kinaiimbweltohan, desidido pa man na liwat magdalagan sa maabot na eleksyon si Camarines Norte Gov. Edgardo Tallado.

 

Sa intrivista kan Bombo Radyo Naga ki Tallado, sinaysay kaini na kwalipikado pa man siyang magkandidato kumo gobernador sa 2016 elections.

 

An saiyang pahayag dae uyon sa sinasabi kan nagkapira na ikaapat na termino niya na sakaling magdalagan liwat sa masunod na eleksyon.

 

Pagtataong linaw kan opisyal, dae niya nakumpleto an kuta na enot niyang termino kan 2007 huli ta pigdeklarar siyang gana laban ki Jesus Typoco kan Comelec taong 2010 na, 45 aldaw antes an panibagong eleksyon.

 

Magkasunod niya man na nangganahan an 2010 asin 2013 elections kaya pwede pa suboot siyang magdalagan sa 2016.

 

Marurumduman duwang semana na an nakakaagi haros 200 na mga raliyesta an nagmartsa puon sa banwaan kan Sta. Elena hasta sa provincial capitol sa banwaan nin Daet ngani ikurahaw an saindang kamawotan na pababaon siya sa pwesto.

 

Sigon sa gobernador, nagtutubod siyang kabale sa mga nagtaram sa nasambitan ng hiro-protesta hale sa radyo na pagsasadiri kan pamilya Regalado asin Unico na bistado niya sa politika.

 

Pagtataong duon kan opisyal, an nasambitan ng mga raliyesta kakadikit sana kun ikukumparar sa haros 120,000 na nagboto asin padagos na nagsusuporta sa saiya.

 

Nagin kontrobersyal si Tallado kan ibulgar sa publiko kan saiyang esposa na si Gng. Josefina Tallado an suboot pambababae asin pananakot kaini sa saiya na pig-ugatan kan saiynag pagdulag hale sa saindang harong.

 

Makalihis kaini, nagkalat man sa social media an suboot romantic photos kan sarong babae kaiba an sarong lalaking kamukha kan gobernador.

 

Mientrastanto, enot sinabi kan gobernador na dawa dae pa nagbabalik sa dati an gabos alagad padiki-dikit na sindang nagkakaayos kan saiyang misis.

NAGA CITY-Agaw-atensyon ngunyan an manlaen-laen na makokolor na parol, belen asin iba pang dekorasyon para sa napaparaning Pasko sa natad kan Camarines Norte Police Provincial Office (CNPPO).

 

Pigkaag an nasambitan ng mga dekorasyon sa nasambitan ng lugar kan Nobyembre 18 kumo parte kan kaenot-enoteng Design and Light a Tree Contest kan CNPPO na pigbalehan kan manlaen-laen na hepatura kan pulisya sa bilog na probinsya.

 

Kada hepatura tatawan nin sarong puon nin kahoy na kaganan nin dekorasyon kataid an iba pang mga dekorasyon arog kan mga higanteng parol.

 

Gabos na mga dekorasyon gibo sa recyclable materials arog na sana kan saradit na belen na gibo sa bunot kan niyog kan PNP-Paracale.

 

Kinaoogma man kan mga aking nagbibisita sa lugar an higanteng snow man na gibo sa mga plastic bottle na hale sa PNP-Daet.

 

Huli sa makolor na mga dekorasyon ini, garo nagin sarong mahewas na Christmas village an palibot kan provincial office kan PNP.

 

Sa huri, binistong nanggana an PNP-Vinzons na nagresibe nin P10,000 huli sa saindang makolor na Christmas tree na garo nakalunad sa sarong dakulang barko, nagpapangduwa an PNP-Basud na nakaresibe nin P7,000 asin pantolo an PNP-San Lorenzo Ruiz na nakaresibe nin P5,000 huli sa saindang belen na gibo sa pinaalang na cogon grass.

 

Pigpapailawan asin pigbubukasan ini sa publiko puon alas 6:00 hasta alas 9:00 nin bangui na matiner hasta sa bulan nin Disyembre.

NAGA CITY-Labing kapungawan sa saiyang agom an pigtutukdong kawsa kan pagbibigti kan sarong padre de pamilya sa Atimonan, Quezon.

 

Sa nakuang impormasyon kan Bombo Radyo Naga, napag-araman na nahiling na sana kan saiyang hipag an biktimang si Danilo Dolindo, 47-anyos na mayo ng buhay sa laog kan saindang kwarto.

 

Ibinitay suboot kaini an saiyang sadiri gamit an sarong evelon cord.

 

Sigon sa live-in partner kan biktima na si Raquel Galvez, nagkaigwa sinda nin diskusyon kan biktima kaya naglayas siya sa saindang harong.

 

Puon suboot kadto, nagin pirmi nang mamundo an biktima hasta sa nagdesisyon na tapuson na sana an saiyang buhay.

 

LEGAZPI CITY--Piglinaw man Public Safety Office na dai sinda nagkulang sa pagpapautob kan ley sa trapiko siring man pagpapatanid sa mga tricycle drivers na magsingil sana man nin tama sa saindang mga pasahero.


Ini an may koneksyon sa nagin reklamo kan mga delegado kan Philippine Institute of Civil Engineers (PICE) National Convention na isinagibo kan Nobyembre 13 sundo 15 sa Ibalong Centrum for Recreation kun saen suboot nabiktima an mga ini kan overcharging kan nagkakapirang drivers.


Sa intrivista kan Bombo Radyo Legazpi ki Mr. Menjo Ofracio, pamayo kan nasambit na oficina, sinabi kaini na tulos nindang inaksyunan an naipaabot na reklamo bilang pag-utob na man sa saindang mga responsibilidad.


Segun digdi, mayong koordinasyon sa saindang an organizing committee kan nasambit na aktibidad kun kaya dai ninda ini napag-ulayan nin marhay alagad ipinahayag kan opisyal na nagsagibo sinda nin inisyatibo ngani na maresolbiran an problema.


Ipinaliwanag pa ni Ofracio na P8.00 sana man an pamasahe sa mga tricyle alagad kun naghihidali an pwedecer na magbayad nin maabot sa P24.00 na kabaing sa allowable capacity kan lunadan na tulong persona.


Kasunod kaini, ipigbuyagyag man kan opisyal na huli sa marikas nindang pagresponde sa problema, naaprehindir ninda an 5 tricycle na "caught in the act" nin overcharging kan Nobyembre 14, aldaw nin biyernes.


Katakod kan nangyari, tinawang duon pa ni Ofracio na may attitude problem an mga tricycle na nagsasagibo kan violation kun saen sinabi pa kaini na 7 sa 10 drivers an mapang-aprubitsar.


Alagad paglilinaw kan opisyal na dapat igwa man nin complainant sa mga siring na reklamo ngani na magin marikas man an pagtataong solusyon huli sa pwedecer na sinda an mabweltuhan encasong mayo nin maisangat na pormal na reklamo asin maninigong ebidensya kontra overcharging.


Huli sa pangyayari, ipighurot ni Ofracio na magkaigwa man lugod nin proper coordination an mga komite na maorganisar kan darakulang mga aktibidad ngani na mapreventaran an siring na mga remalaso huli sa suboot kasusupgan na pigdadadara kaini sa lugar.

 


LEGAZPI CITY--Pigmamawot ngunyan kan Department of Environment and Natural Resources-Bicol na maimukna an Wildlife Rescue Center sa Albay Park and Wildlife para sa mga endangered species sa bilog na rehiyon.


Ini an ipigbubusol kan ahensya katuwang an provincial government kan Albay ngani na mareyalisar ini sa urog na marikas na panahon sa paagi kan Memorandum of Agreement (MOA) sa pagultanan kan duwang lado.


Sa nagin pahayag kan representante kan DENR sa sesyon regular sa Sangguian Panlalawigan na si Ms. Yolly Saung, tatagamahan kan ahensya an nasambit na pagpapakonstruhir kan edificio nin kantidad P5 milyon na magikan mismo sa sainda asin itatao na man sa lokal na gobyerno.


Segun digdi, magkakaigwa nin bagong MOA para sa konstruksyon kan pasilidad sa laog kan Albay Park and Wildlife huli sa igwa na nin naenot na MOA na nagdurar puon kan 2004 sundo 2007 sana man.


Paliwanag ni Saung na sa presenteng MOA na lalaugan kan duwang lado, abuton ini nin sampulong taon basado na man sa terms of agreement depende kun irerevoke.


Kasunod kaini, sa nagin presentasyon kan representante sa regular na sesyon, ipigpahayag kaini na may legal na basehan an konstruksyon kan edificio na iyo an Section 36 kan R.A. 9147 o an "Wildlife Resources Conservation and Protection Act of 2001."


Katakod pa kaini, katuyuhan kan pagmumukna kan pasilidad an ma-conserve asin maprotehiran an mga wildlife species siring man an saindang mga istaran ngani na i-promotir an ecological balance asin ma-enhance an biological diversity.


Tinawang duon man na magseserbing quarantine area an pasilidad kun saen dadarahon an mga nakumpiskar o nakuang mga wildlife species gikan sa manlain-lain na lugar kan mga provincia kan Bicol.


Marurumduman na nagbutwa an isyu kan pagkakalugi kan Albay Park and Wildlife na pinahimutikan man kan manihamiento alagad inako na nagkukulang sana man sa mga nakokolektang budget kun kaya naghahagad nin ayuda sa lokal na gobyerno ngani na maipadagos an operasyon.


Mientrastanto, tinawan duon kan representante kan DENR na magkakaigwa nin separadong responsibilidad an ahensya siring man an lokal na gobyerno oras na ini an mareyalisar.


Segun sa nagin presentasyon ni Saung, an DENR an madesignar sa Albay Park and Wildlife bilang temporary depository kan mga confiscated, rescued, retrieved asin donated na wildlife species siring man pagdodonar nin mga wild animals.


An ahensya man an magmamantenir kan database o rekord kan mga naidedepositong mga hayop asin pagkokondusir nin monitoring.


Apwera pa digdi, sinda man an in-charge sa pagtataong assistencia sa parke sa gabos na operasyon na gigibuhon kaini para sa mga hayop.


Sa ibong na lado, an lokal na gobyerno an masalo sa gabos na maintenance cost kan mga hayop siring man an pagkondusir nin mga pag-aadal mapadapit sa mga datus kan mga ini.


Dugang pa digdi an information dissemination sa publiko ngani na magin "aware" sinda sa mga kaaraman mapadapit sa hayop.


Kasunod kaini an pagibo nin mga inventory kun igwa nin mga nagadan na hayop o naimundag sa kada pagtatapos kan kwarto kan taon.


Sa ibong kaini, kaipuhan pa man liwat kan lokal na gobyerno na maghagad nin permiso sa DENR kun may isasagibong paglilipat sa mga hayop na nasa laog kan pasilidad.


Marurumduman na enot nang nagkaigwa nin mga report dapit sa mga nakuang endangered species sa rehiyon siring kan mga pawikan asin bayong kun kaya pigbubusol man na maibugtak an nasambit na edificio.


An Pilipinas an konsideradong saro sa deci-seteng megadiverse countries siring man global biodiversity hotspot.


Sa 2000 Red List of the International Union for the Conservation of Nature and Natural Resources (IUCN), nagluluwas na 418 sa 52,177 species kan nasyun an nasa listahan kan mga namemeligrong hayop.


An nasyun man an saro sa mga may pinakahalangkaw na discovery sa bilog na kinaban na may 16 na new species nin mammals na nadiskubre sa nakalihis na 10 taon.


Huli digdi, an rate kan endemism para sa Pilipinas an naglangkaw man asin piglalaoman na malangkaw pa sa mga masunod na panahon.

 


LEGAZPI CITY - Makikipag koordinar ngonyan an hepe kan Malinao Municipal Police Station sa may sadiri o nasa likod kan Christmas Village sa sinambit ng banwaan may kinaaraman sa prisencia kan mga individwal asin grupo na nagdadara nin arak sa lugar.

 

Pirang semana na an nakakalihis puon kan buksan sa publiko an sinambit ng bagong atraksyon, pigruruso na ini kan mga kababayan, magin kan mga local asin foreign tourist na mawot na mahiling an manlaen-laen na mga desinyong siring kan mga famosong pasyaran sa manlaen-laen na parte kan nacion na panu nin Christmas light.

 

Tema ngunyan na taon an "Christmas Around the World" kun saen mahihiling an mga historical sites na pirmihang pigdadayo kan kadaklan.

 

Kabale na digdi an Eiffel Tower kan Paris, Opera House kan Australia, Great Wall of China, Statue of Liberty kan Amerika, Pyramid of Egypt, an iconic clock tower o "Big Ben" sa London asin iba pa.

 

Segun ki Pol. Sr. Insp. Arthur Gomez, dawa anion an prisencia kan saiyang mga personahes sa oras kan pagbukas asin pagsarado kan sinambit ng Christmas village, makikipag koordinar pa man liwat sinda kay. Dr. Llianco na iyu an may ideya kan sinambit ng bagong atraksyon sa provincia ngani na matawan nin atensyon asin patanid an mga indibidwal o grupo na nagdadara nin arak sa lugar dawa pa libre an siisay man na maglaug digdi asin magdara nin mga kakanon.

Albay, posibleng maging Dolphin sanctuary na

Thursday, 20 November 2014 17:58

 


LEGAZPI CITY - Posibleng maging dolphin sanctuary na an Provincia nin Albay huli kan sunod sunod na mga coastal areas kan provincia na igwa nin prisencia kan ginatos na mga dolphins.

 

Saru sa mga pighihiling na rason digdi an pagkakaigwa kan provincia nin 'good ecological practices' kabale na an mangrove reforestation.

 

Dawa na ngani nagbaba an turismo kan provincia huli sa pagiging balik silencio kan bulkan Mayon, panibagong atraksyon ngonyan an manonotaran sa mga kadagatan kan Albay Gulf.

 

Pirang semana na an nakakalihis kan punan na rusuon kan mga local asin foreign tourist an banwaan kan Sto. Domingo huli kan pigsasabing schools of dolphins.

 

Mantang bako naman haros bago sa mga Bicolano an prisencia kan mga butanding o whale shark apwera pa sa mga nalalagalag na mga pawikan sa mga baybayon kan Albay Gulf.

 

Katakod kaini, mahigot naman na pig-aadalan kan Department of Tourism an pagdeklalar kan provincia particular kan pagkakaigwa kan prisencia nin mga dolphins ngani na maging dagos na dolphin attraction.

 

Sa ibong na lado, antes na matapos an taon, piglalaoman an urog na pagkusog kan turismo, apwera sa labi sa un mil na partisipantes asin bisita para sa Asia Pacific Economic Cooperation (APEC) Summit sa Desyembre 8-9, anion man an panibagong atraksyon sa banwaan kan Malinao an Christmass Village, mapuon naman an monthlong Karangahan Albay Green Christmas Festival na kaenot enote sa Pilipinas, an signature Christmas tree fashioned o gibo sa rinibong kamote o sweet potato tubers.

 

Ini an nagpapahiling o nagrereprisentar kan successful food production program kan Albay.

 

 

LEGAZPI CITY - Pasado na sa 3rd and final reading sa isinagibong sesyon regular kan Sangguniang Panlalawigan kan Albay an ordinansang may titulong, 'An Ordinance establishing the "Equal Scholarship Fund" for all the community Colleges and Bicol University Satellite Campuses (BUSCs) within the Province of Albay through the Provincial Education Department (PED) and providing guidelines and funds'.

 

An ordinansang ini an pig sponsoran, an proponent iyu si Hon. Benjamin Imperial asin an mga co-authors, an gabos na mga miyembro kan Sangguniang Panlalawigan.

 

Maabot sa kantidad P30-M kada taon an mareresibe kan sinambit ng mga community colleges sa Albay bilang suporta sa mga estudyanteng mayong kakayahan na suportahan an saindang pag klase.

Contact Us

  • Address: 2406 Nobel corner Edison Streets, Makati City Philippines
  • Tel: +(632) 843 0116
  • Fax: +(632) 843 0116
  • Email: This email address is being protected from spambots. You need JavaScript enabled to view it.