You are here: HomeRegional NewsBicolano

 


(UPDATE) LEGAZPI CITY -- Kinasuhan na an tulo sa siyam katawo na naarestar sa isinagibong raid kan Sorsogon Criminal Investigation and Detection Team (CIDT) na suboot miyembro kan 'Interpol Commission'.


Binisto an mga ini na sinda Reymar Jalmansar, 29 anyos, Salvador Demdam, 50 anyos asin Wudruff Jalmanzar, 39 anyos.


Nakua sa posisyon ni Reymar an 9mm, magasin, 7 bala nin 9mm, Interpol ID, Badge asin ID na may nakalaag na "Samahang Magdalo.''


Nakua man kay Salvador an cal. 45, magasin na mayong bala, Interpol Id asin badge mantang kay Wudruff iyu an 9mm, magasin, 8 bala para sa 9mm asin maging an ID na interpol.


Kasong pagbalgar sa 10591 or Comprehensive Firearms and Ammunition Regulation Act asin Violation of Art. 177 kan Revised Penal Code o Usurpation of Authority an pigkakahampang ngunian kan mga suspek.


Mientrastanto, nakaliobre naman an iba pang nadakop kan CIDT na binistong sinda Bereguer, Santos Jarlego, Celeste Dreo, Wilson Hubilla, Manuel Johann Olaño asin Ronnie Gardon.


Segun sa mga otoridad, may nagpaabot sa sainda nin impormasyon na nagkakaigwa nin miting sa lugar asin may mga sukbit pang badil an mga ini.


Napag-araman na an grupo an mga opisyal asin miyembro kan International Police Commission na may ranggo na may ranggo suboot na Colonel, Lieutenant, Captain asin Sergeant.


Sa ngunyan, padagos pa an pigsasagibong imbestigasyon kan mga otoridad sa mga nagpabistong miyembro kan Interpol.

Ex - PAF member, binadil-gadan sa Sorsogon

Tuesday, 25 November 2014 19:28

 

LEGAZPI CITY -- Nahahadit ngunyan an mga residentes sa sunud-sunod na kaso nin pagkagadan sa provincia kan Sorsogon.


Binisto an ika-anom na biktima nin pambabadil-gadan ngunyan na bulan pa sana nin Nobyembre sa nasabing provincia na si Alvin Balagot y Galindez, 27 anyos, dating miyembro kan Philippine Air Force.


Segun sa impormasyon, naglilinig suboot an biktima sa hampang kan harong kan ranihon ini kan limang kalalakihan asin binadil sa payo asin iba pang parte kan hawak na nagresulta sa tulos kaining pagkagadan.


Naglaog man suboot an mga suspek sa harong asin pinaghahanap an badil kan biktima alagad mayo man nin nakua kundi solamenteng cellphone kaini.


Nakua sa crime scene an tulong empty cartridge nin kalibre .45 na ngunyan an pigsasairarom na sa ballistic examination mantang nagpapadagos man an imbestigasyon sa panggagadan.

 


LEGAZPI CITY-- Nagtetenir na palaisipan ngunian sa mga awtoridad an motibo sa nangyaring panggagadan sa sarong dating barangay kagawad sa provincia kan Catanduanes.


Enot digdi, nakua na sana man kan saiyang agom an biktimang si Salvacion Bernal Pamplona, 43 anyos, asin residente kan Brgy. Progreso, banwaan kan San Miguel, na duguan asin mayo nang buhay sa laog kan kusina kan harong kan sarong Dante Morales Tilar,39-anyos, sarong negosyante asin ex-convict, residente kan parehong lugar.


SEgun sa agom kan biktima, antes an panggagadan, nagpaaran an saiyang misis na maluwas ngani na magbakal alagad dai na ini nagbalik.


Base sa resulta kan eksaminasyon, 'contusion hematoma' huli sa 'traumatic blunt injury' sa payo an nagin kawsa kan pagkagadan kan biktima.


Sa ngunyan, pig-aaram na man kan mga awtoridad an posibleng koneksyon ni Tilar sa nasabing krimen.

 


LEGAZPI CITY-- Naisapinal na an planong pagsususpinder nin klase sa gabos na level sa provincia nin Albay para sa gigibohong Asia -Pacific Economic Cooperation - Informal Senior Officials Meeting (APEC-ISOM) sa maabot na Desyembre 8 - 9, 2014.


An nasabing lakdang an kasunod na man kan joint advisory kan Regional Disaster Risk Reduction and Management Council asin Provincial Disaster Risk Reduction and Management Council.


An pagsuspender kan klase an saro sa lakdang kan lokal na gobyerno ngani matutukan an seguridad kan mga international delegates gikan sa manlaen laen na nacion asin malikayan na mabanga an atensyon kan mga otoridad sa pagbabantay.


Sa ngunyan , pighahalat na sana an pormal na resolusyon para sa pagpapaotob kan kasuguan sa mga nasabing aldaw.


Kaiba sa mga piglalaomang mapadara nin delegado iyu an Australia, Brunei, Canada, Chile, China, Hong Kong, Indonesia, Japan, South Korea, Malaysia, Mexico, New Zealand, Papua New Guinea, Peru, Pilipinas, Russia, Singapore, Taiwan, Thailand, Vietnam asin Amerika.


An pagtiripon an partikular na gigibohon sa duwang bistong hotel sa provincia nin Albay.

 

 

LEGAZPI CITY-- Ipigsasairaum na ngunyan sa tactical interrogation an pigsasabing amazonang lider kan mga rebeldeng New People's Army na nadakop sa provincia kan Masbate.


Binisto ining si Yvhonie Victor alyas Kumander Pinang 32-anyos residente kan Barangay Amotag, banwaan kan Aroroy, nasabing provincia.


Naarestar si Victor sa sarong Lodging House sa Altarejos Street, Barangay District 3 , banwaan kan San Jacinto sa tapat mismo kan hepatura kan pulisya.


Enot digdi, nagpanggap pa soboot an suspek na miyembro kan PNP asin nagpaiba sa ospital huli sa pangungulog kan tulak alagad dae na ini nakadulag pa sa kamot kan mga awtoridad.


Sa ngunyan ,pig aaram na man kan mga awtoridad an pagkakabisto sa iba pa kaining mga pag iriba.

 


LEGAZPI CITY -- Liwat na mahampang ngunyan na aldaw sa mga Bicolanong lehislador an manlaen- laen na ahensya kan gobyerno sa Albay katakod pa man kan problemang pigkakahampang kan provincia sa pagpapa-ebakwar tuyong nag-aalburuto an Bulkang Mayon.


Kabale sa mga inimbitaran iyu an Albay Public Safety and Emergency Management Office (APSEMO), Department of Health (DOH), Department of Social Welfare and Development(DSWD) , Department of Education (DepEd), Office of Civil Defense (OCD) asin an mga alkalde kan mga apektadong ciudad asin banwaan.


Sa intrivista kan Bombo Radyo Legazpi ki Congressman Rodel Batocabe, sinabi kaini masentro an pag-oolay sa pagtataltag nin permanenteng solusyon sa problemang pigkakahampang kan provincia oras na nag-aalburuto an bulkan.


Kabale man digdi an pag-asses sa mga nagastos kan lambang LGU tuyong nagpapaotob kan pagpapa ebakwar asin an mapadapit sa paglalaag kan 'permanent relocation' asin dagos na pagpapaali sa mga namamanwaan na nakaistar sa laog kan permanent danger zone kan bulkan.


Astyan na ala- 1:00 nin hapon isasagibo an nasabing pagtiripon sa kongreso.


Mientras tanto, nagpaliwanag man an Bicolano Bloc kun nata dae na liwat inimbitaran an Philippine Institute of Volcanology and Seismology (Phivolcs) na saro sa mga nagisa kan enot na inquiry asin maging an liwat na dae pag-imbitar kay Governor Joey Salceda.


Segun kay Cong. Batocabe, naipaliwanag na kan Phivolcs an estado kan bulkan asin naipahayag na man kaini an saindang lado katakod kan pagpapaebakwar kun kaya dae kaini kaipuhan pang mag atendir.


Pag-abot man sa dae pag-imbitar sa gobernador, pigsierto kan lehislador na matalaan sinda nin panahon ngani pahampangon man si Salceda sa saindang paghahapot alagad bako pa ngunyan.

 


Tolong sibilyan an lugadan sa panibagong pag-atake kan mga rebeldeng New Peoples Army (NPA) sa sarung temporary patrol base kan Philippine Army's 93rd Division Reconnaissance Company sa probinsiya kan Masbate.


Segun kay Philippine Army 903rd Brigade Commander, spokesperson 1Lt. Clint Antipala, nangyari an pagsakyada bandang alas-8:30 kasubagong pagkaaga sa may Sitio Guiwanon, Barangay Danao banwaan kan San Jacinto sa Ticao Island.


Sinabi ni Antipala na sainda pang pig-aaram an pagkakabisto sa tolong sibilyan mantang saru sa sainda an nasa seryosong kondisyon.


Segun pa Antipala nadiskubri na sana man kan mga suldados na igwa nin casualties makalihis na pauranan an saindang patrol base kan mga rebelde.


Tolos man na idinalagan sa hospital an tolong lugadan na sibilyan, mantang nagpapadagos an hot pursuit operations kan militar sa lugar kontra sa mga rebeldeng NPA.

 

LEGAZPI CITY-- Saru na naman na panibagong insidente nin pambabadil-gadan an nairehistro sa provincia kan Sorsogon.


Ini an pirang aldaw sana man makalihis an nangyaring panggagadan sa sarung paraoma sa parehong provincia na segun sa militar gibo kan mga rebeldeng New Peoples' Army.


Sa panibagong insidente, nabisto an biktimang si Ramilo Basares Penos, 44 -anyos, laborer asin residente kian Sitio Inalapan, Bgy Gerona, banwaan kan Bulan.


Antes an insidente, ultimong nahiling an biktima na nasa balkonahe kan saindang harong na nakatukaw mantang nagtetext kan bigla na sana man ining dulukan kan tolong dae nabistong kalalakihan asin pinagbabadil sundo sa magadan.


Naidalagan pa kuta sa ospital an biktima alagad idineklara ining dead on arrival.


Enot kaini, naging maribok an mga impormasyon na pigpupunan na suboot kan mga rebelde na ilikida an mga personang imbwelto sa panggagadan sa saindang tagapagtaram na si Ka- Greg Bañares kan nakalihis na taon sa porsyon kan Brgy. Calmayon, banwaan kan Juban.


Sa naenot na entrevista kan Bombo Radyo Legazpi kay Col. Beerjenson Aquino kan 31st Infantry Battallion, sinabi kaini na an mga siring na lakdang kan mga rebelde an nagpapahiling sana man kan saindang kawaran nin utang na boot sa mga personang saindang dating pinakinabangan.


Segun kay Col. Aquino, an paraoma na ginadan sa porsyon kan Brgy. Calmayon kan nakalihis na aldaw an dating nagpapadagos kaito sa mga rebelde sa saiyang harong na posibleng pinagsupuniran suboot kan mga ini na nagiging informant na kan militar.

 


LEGAZPI CITY-- Senentenciahan na kan korte an driver kan bus na nakabangga asin nakagadan Bicolana Beauty Queen na si Melody Adelheid Gersbach apat na taon na an nakakalihis.


Apat sundo sampulong taon na pagkakakulong apwera pa sa P75,000 na indemnity sa pamilya kan beauty queen asin iba pang pag-iriba na nagadan sa aksidente an pigkakahampang kan bus driver na Wilson Pontillas, residente kan Bato, Camarines Sur.


Apwera digdi, mabayad man ni Pontillas sa mga nawalat ni Melody nin P4,805,243.00 sa mga naging danyos asin gastos na kawsa kan aksidente sa pamilya kaini kabale na an mga ginastos sa pagpapalubong.


Si Pontillas an enot ng nahampang sa kasong reckless imprudence resulting to multiple homicide, serious physical injuries, asin damage to property.


Marurumduman na alas-11:00 nin aga kan Agosto 21, 2010 kan mangyari an aksidente sa kahalabaan kan National Highway sa Sitio Banase, Barangay Pawili, Bula, Camarines Sur na nagresulta sa pagkagadan kan reigning Miss International Philippines na si Melody, saindang driver na si Santos Abuera Ramos asin saro pa na binistong si Alden Orense mantang nakasalbar man si Ronald Lita na nagsapo nin labing danyos sa hawak.


Sa isinagibong pagdangog, napatotoohan na marikas an pagpapadalagan kan bus kun saen b inalo pa kaining mag-overtake sa sarong motorsiklo kawsa ngani na mabangga an Toyota Innova na piglulunadan ni Gersbach asin dagos na makabangga sa kahoy nin acasia sa gilid kan dalan.


Mientrastanto, kun dae man mababayadan kan diver an mga kantidad na kabale sa mga civil liabilities kaini, obligado an maysadiri kan Guevarra Bus Line na simbagon an nasabing kantidad.

 


LEGAZPI CITY-- Nagtutubod an sarong boxing analyst na dai maabot nin 12 rounds asin mapapatumba ni Manny Pacquiao an Amerikanong si Chris Algieri.


Sa intrivista kan Bombo Radyo Legazpi kay Councilor Abing Rodolfo kan Bato, Catanduanes, sinabi kaini na baku na bago na makahampang ni Manny an mas darakula asin haralangkaw na siring ni Algieri asin baku man ini bastante na basehan ngani na masabing llamado o dehado an sarong boksingero.


Segun digdi, pinagprepararan nin marhay ni Pacman an laban urog pa asin target talaga kaini an 'mega-fight' kay Floyd Mayweather na dai na mangyayari kun siya an madadaog.


Paliwanag kaini, kun rikas, kusog asin eksperyensya an pag-uulayan an lamang na lamang an Peoples' champ.


Pagkakarkulo ni Rodolfo, sa pagultanan kan 6-8 rounds an mabigay na an kano.


Kun pagbabasehan man suboot an mga naenot na laban ni Algieri an mayo ining maikokonsiderar na 'impressive win' magin an laban kay Ruslan Provodnikov na nagin makontroberysal.


Sa ibong kaini, sinabi ni Rodolfo na dapat na mag-ingat si Pacquaio sa 'over head right' ni Algieri huli sa ini an makusog na suntok kan kalabang kano.

Contact Us

  • Address: 2406 Nobel corner Edison Streets, Makati City Philippines
  • Tel: +(632) 843 0116
  • Fax: +(632) 843 0116
  • Email: This email address is being protected from spambots. You need JavaScript enabled to view it.