You are here: HomeRegional NewsBicolano

 


LEGAZPI CITY -- Padagos ngunyan an pagbukod kan pwersa kan gobyerno sa mga pinagtutubudan na miyembro kan rebeldeng New People's Army (NPA) na uminatake sa saindang temporary patrol base kasudma sa Brgy. Maopi sa banwaan kan Daraga sa provincia nin Albay.


Sa intrevista kan Bombo Radyo Legazpi kay Col. Perfecto Peñaredondo, commanding officer kan 2nd Infantry Battalion, Philippine Army, enot na nahiling an presencia kan mga pinagtutubudan na mga miyembro kan NPA sa lugar.


Segun digdi, enot na nagpaabot nin impormasyon an mga residentes dapit sa tulo sundo limang kalalakihan nagpapalibot sa lugar.


Tulos man suboot sindang nagsagibo nin operasyon na nagdurar nin pirang minuto.


Mayo man nin nairehistrong casualty sa lado kan Pwersas Armadas alagad dae man macierto kun igwa nin tinamaan o nagadan sa lado kan mga rebelde.

 


LEGAZPI CITY-- Dae minati kan 65-anyos na paraoma sa banwaan kan Oas, sa Albay an halawig na biyahe asin kakapusan sa kwarta makaabot sana man sa Manila ngani na ipangapodan an hustisya sa pagadan sa saiyang ataman na ayam.


Si Silvestre Ravago, an personal na nagpasiring sa Philippine Animal Welfare Society (PAWS) sa Quezon City ngani na magtulod nin reklamo sa kaisugan na ginibo kan suspek sa saiyang ataman.


Enot kaini, linaog kan buyong na suspek an harong kan lolo asin pinagtitigbas an ayam na si 'Ella' sundo sa magadan makalihis ining pagparabatukon.
Apwera kaini, kinulgan pa kan suspek an aki kan biktima na nagbalo kuta na magsaway.


Tolos na nagpasiring si Ravago sa hepatura kan Oas MPS alagad sinayumahan siya kaini asin itinukdo sa PAWS sa rason na mayo suboot sa irarom kan saindang hurisdiksyon an kaso kontra sa mga hayop.


Dara an litrato kan nagadan na ayam, kasabay an certification asin report gikan sa mga opisyal kan barangay, kusog-boot na idinulok kan lolo an reklamo sa oficina kan PAWS.


Dae man ini nabigo makalihis na tolos na magsimbag an opisina ngani na pormal na maitulod an reklamo kontra sa suspek.


Apwera digdi, nagsurat man an PAWS sa chief of police kan banwaan ngani na maipaaram sa sainda an saindang obligasyon asin dapat na gibuhon sa mga siring na kaso urog na an mapadapit sa Animal Welfare Act.

 


LEGAZPI CITY -- Gadan an saru sa mga suspek sa pagagan kay dating Makati Engineer Nelson Morales makalihis ining manlaban sa mga otoridad.


Segun kay P/S Supt. Marlo Meneses, Provincial Director kan Albay Police Provincial Office, enot na nahiling si Ransom Concepcion sa banwaan kan Polangui na tolos man na sinundan kan mga pulis.


Uminabot pa suboot ini sa banwaan kan Libon asin digdi na nagkaputukan kan manlaban an suspek.


Tinamaan ini sa manlain-lain na parte kan saiyang hawak rason kan tolos-tolos na pagkagadan.


Si Ransom an kaiba sa 'Concepcion Group' na pigpapangenotan kan tugang kaini na si Gilbert Concepcion na iyu an ipigtutukdong 'prime suspek' sa pagadan kay Eng. Morales.


An suspek an dati nang may warrant of arrest katakod kan pigkakaimbweltuhan na kaso.


Marurumduman na kan Setyembre 7, 2012 kan magadan si Eng. Morales makalihis ining pagbabadilon sa hampang mismo kan Simbahan sa banwaan kan Malinao na pinagsasabing may plano kuta na magdalagan bilang alkalde kan banwaan.

 


LEGAZPI CITY -- Suspendido an alkalde kan banwaan kan Bulan sa Sorsogon nin 90 - days huli sa pag-abuso sa poder.


Susog sa desisyon kan Sangguniang Panlalawigan, guilty si Mayor Marnellie B. Robles sa kasong isinangat ni Municipal Councilor Crisostomo Gotladera.


Apwera kaini, may suhay man na kaso an opisyal na 'culpable violation of the Constitution, dishonesty, oppression, gross negligence asin grave abuse of authority.


Alagad solamenteng denisisyunan kan Sanggunian iyu an kasong abuse of authority, oppression, asin gross negligence may relasyon sa saiyang performance bilang chief executive kan banwaan.


Susog sa desisyon, "guilty" si Robles sa paggamit kan pondo kan gobyerno para sa saiyang duwang aki na nag-eeskwela sa De La Salle College of St. Benilde.


Apwera kaini, "guilty" an alkalde sa pag-abuso kan saiyang poder sa pag-issue nin 'no-objection certification' may kinaaraman sa pagputol kan mga kahoy sa Bulan Tree Tunnel.


Guilty man suboot an opisyal sa oppression asin grave abuse of authority sa pagsayuma kaini na bayadan an retirement asin terminal leave benefits kan mga dating opisyal asin emplayado kan lokal na gobyerno.


Si Robles an nahahampang man sa 'recall election' na liwat na pinabukasan kan Commission on Elections kaini pa sana man na nakalihis na semana.

NAGA CITY-Plano ngonian kan Bicolano cue master na si Raymund Faraon na idagos an magayon na napunan sa kinaban nin billiards.

 

Sa entrevista kan Bombo Radyo Naga sa 26-anyos na si Faraon, sinaysay kaini na makalihis na manggana sa 47th All Japan Championship, urog na nagkusog an saiyang boot na padagos na abuton an saiyang pangiturugan.

 

Makalihis bistuhon na kampeon sa nasambitan ng tournament, plano man ni Faraon na magbali sa gabos na world ranking tournament huli ta saro su boot sa saiyang pangiturugan an magin world number one sa cue sports.

 

Inako man ni Faraon na nadipisilan siyang makabali sa mga international competition huli ta haliy antes makakua nin sponsor asin suporta sa gobyerno huli na man sa numero kan mga matitibay na mga parakawat.

 

Huli digdi, labi an saiyang pasasalamat ki Gov. Migz Villafuerte na iyong nagtabang sa saiya ta nganing makakawat sa Japan.

 

Basado ki Faraon, nagin kapital niya sa saiyang naabot ngonian an saiyang tiyaga asin tiwala sa sadiri.

NAGA CITY-Dae na naisalbar pa an sarong lolo makalihis na maghugot sa Basud, Camarines Norte.

 

Binisto an biktima na si Roberto Alpay, 72-anyos.

 

Sa nakuang impormasyon kan Bombo Radyo Naga, napag-araman na nadukayan na sana kan saiyang aki an biktima na nakabitay na sa laog kan saindang harong gamit an sarong pisi.

 

Napag-araman na igwang pendidong kasong rape si Alpay sa Women and Children Protection Desk kan PNP-Basud.

 

An kaso, nag-ugat su boot sa akusasyon kan sadiri kaining menor de edad na makuapo.

 

Katakod kaini, pigtutubudang an haloy ng sintikan sa saindang pamilya asin an kinakahampang na kaso an nagtulod sa biktima ta nganing maghugot.

NAGA CITY-Irido an tolo katao makalihis na magkabungguan an sarong motorsiklo asin tricycle sa Vinzons, Camarines Norte.

 

Sa nakuang impormasyon kan Bombo Radyo Naga, napag-araman na mantang pigbabagtas kan tricycle na pigmamaneho ni Robert Castillo lunad si Yolanda Fernando an kalabaan kan tinampo tinampo kan luwayan kaini an pagpapadalagan kan behikulo huli sa paglaog sa sarong slowdown metal barricade.

 

Alagad nakubanan na sana an biktima kan bigla siyang bungguon kan marikas na motorsiklong pigmamaneho man ni Eric Balane.

 

Huli kaini, anas nagsapo nin lugad sa saindang lawas an mga biktima.

 

Pigtutubudang burat si Balane kan mangyari an bungguan.

 

Tulos man na idinalagan sa ospital an tolo ta nganing mabulong mantang nasa kustodiya na kan PNP an mga imbueltong lunadan.

NAGA CITY-Arestado an sarong padre de pamilya makalihis na makuanan nin iligal na droga asin armas sa Baao, Camarines Sur.

 

Binisto an suspek na si Alexander Bolalin, 42-anyos.

 

Napag-araman na dinumanan kan mga otoridad an harong ni Bolalin ta nganing iserbi an sarong search warrant.

 

Sa saindang pag-im,bestigar, nakua sa posisyon ni Bolalin an duwang sachet na may pigtutubudang shabu, mga drug paraphernalia, .38 caliber revolver asin sampulong live ammunition para sa nasambitan ng badil.

 

Huli kaini, tulos na inarestar an suspek na ngonian, nahahampang na sa kasong pagbalgar sa RA 9165 asin RA 10591.

NAGA CITY-Nakagadan na, nagdulag pa an sarong driver makalihis mabudalan an sarong lalaki sa San Fernando, Camarines Sur.

 

Hasta sa ngonian, padagos pa man na pighahanap kan kapupulisan kun siisay an nakabudal sa 42-anyos na construction worker na si July Cadiz.

 

Nadukayan na sana an lawas ni Cadiz sa gilid kan dalan sa Barangay Planza sa nasambitan ng banwaan.

 

Basado sa mga nakaheling, sarong marikas na lunadan an nakabudal sa biktima mantang ini an nagbabalyo.

 

Alagad imbes na tabangan an biktima, dagos ining nagdulag.

 

Seryosong danyos sa payo asin lawas an sinapo ni Cadiz na nagin kawsa kan saiyang kagadanan.


LEGAZPI CITY -- Dumipensa an gobernador kan Albay dapit sa pagsususpender kan klase sa Desyembre 8-9 kan presenteng taon huli sa nagdadangadang na Asia Pacific Economic Cooperation - Informal Senior's Officials Meeting (APEC-ISOM) sa provincia.


Ini makalihis na batikuson kan nagkakapirang kongresista an nasabing kasuguan na dae man suboot nauuyon huli ta dae man makakaapektar an mga estudyante sa gigibuhon na pagtitipon.


Segun sa opisyal na pahayag ni Gov. Joey Salceda, ini an base naman sa rekomendasyon kan Department of National Defense (DND) asin bako mismo gikan sa sainda.


Segun digdi, nagkaigwa muna nin konsultasyon sa mga stakeholders antes na isapinal an nasabing suhestyon kan DND ngani naman na matutukan an seguridad kan mga delegado gikan sa manlaen-laen na nacion.


"It is a recommendation of security officials. In China, all factories were closed (pollution), offices and schools were suspended also. I will not debate the issue in public. We have been announcing the 2- day class suspension for almost one month now and we have consulted all the stakeholders"


Dugang pa kaini, bako sana man sa Albay gigibuhon an nasabing lakdang kundi maging sa ibang host provinces kan APEC Summit sa nacion.

Contact Us

  • Address: 2406 Nobel corner Edison Streets, Makati City Philippines
  • Tel: +(632) 843 0116
  • Fax: +(632) 843 0116
  • Email: This email address is being protected from spambots. You need JavaScript enabled to view it.