You are here: HomeRegional NewsBicolano

LEGAZPI CITY-- Arestado sa isinagibong entrapment operation kan National Bureau of Investigation (NBI) an Acting Mayor kan banwaan kan Bulan sa provincia nin Sorsogon.

 

Ini katakod kan kasong 'illegal practice of medicine' na suboot pinagigibo sa mismong harong ni dating Vice Mayor Patricia 'Tessie' Guran na kakatukaw pa sana man bilang alkalde kan banwaan kan Lunes makalihis an suspension order kay dating Mayor Marnellie Bllisteros Robles.

 

Sa entrevista kan Bombo Radyo Legazpi kay NBI Agent-In- Charge Manny Eduarte, sinabi kaini na bandang alas 7:30 kasubagong aga kan arestaron an opisyal makalihis an ipinaabot na reklamo sa sainda duwang semana na an nakakalihis.

 

Segun digdi, base sa saindang isinagibong verification sa Professional Regulation Commission (PRC), napag-araman na bako lisendyadong physician si Guran.

 

Mientrastanto, piglinaw man ni Eduarte na isolated case an pagkakadakop kay Guran sa mga isyung pigkakahampang kan banwaan.

 

Marurumduman na enot nang naging tensyunado an banwaan kan Bulan huli sa pagpapatukaw kay Guran sa posisyon mantang naninidugan man na dae mababa sa pwesto si Robles sa ibong kan suspensyon huli sa mga kasong pigkakahampang.

 

Si Guran an paramientras na kuta na nagtukaw sa posisyon asin nag-oopisina sa lumang munisipyo sa ibong kan pagkontra kan kampo asin mga tagasuporta ni Robles.

 

 

LEGAZPI CITY--Mahigot na pinatanidan kan gobernador kan provincia kan Albay na magin preparado an gabos na mga opisyal mga barangay, banwaan asin ciudad sa piglalaoman na pagrapado kan Bagyong Ruby o may International name na Hagupit.

 

Basado sa ipinaluwas na advisory kan Provincial Disaster Risk Reduction and Management Council na pinamamayuhan ni Albay Governor Joey Sarte Salceda, pinagdidirihan an gabos na mga opisyal na mag-monitor sa latest updates kan PAGASA asin PDRRMC sa paagi kan DRRMC's siring man mga local radio stations sa kamugtakan kan panahon.

 

Kabali man digdi an pag-review sa saindang mga risk reduction plan kontra sa baha, makusog na duros, pagrasay kan daga lahar asin coastal flooding o storm surge.

 

Mahigot man ni Salceda na ipinagirumdum an evacuation encaso magkaigwa nin makusog na pag-uuran na kumpirmado kan PAG-ASA weather bulletins.

 

Pinag-dirihir pa kaini na magkaigwa nin listahan kan saindang mga residente asin salbadong mga evacuation centers siring man an koordinasyon sa mga otoridad ngani na matabangan encaso magkaigwa nin mga problema na dai piglalaoman.

 

Para man sa mga residente, hagad ni Salceda an saindang kooperasyon kun magpautob nin mga evacuation.

 

Marurumduman na sa anu man na kalamidad, pirimihan na target kan provincia an Zero Casualty goal kun kaya mahigot an pigsasagibo kaining preparasyon sa atab na panahon.

 


LEGAZPI CITY -- Labi an panhihinayang kan mga netizen sa Albay sa pagkakanselae kan Asia Pacific Economic Cooperation - Informal Senior Officials Meeting ( APEC - ISOM) sa provincia.

 

Ini an base naman sa desisyon kan Asia-Pacific Economic Cooperation (APEC) 2015 National Organizing Committee (APEC - NOC) na ilipat an venue sa Metro Manilan huli sa huma kan Bagyong si "Hagupit".

 

Padagos ngunyan an pagbulos kan manlaen -laen na reaksyon kan mga namamanwaan sa nasabing desisyon.

 

Segun sa nagkapira, haloy na pinagprepararan kan provincia an nasabing international event asin dakula na an na-invest digdi bako sana kwarta kundi an halos dywang taon na pagal asin kadipisilan para sana man maciertong magiging preparado an gabos.

 

Dugang man kan iba, dakulang opurtunidad para sa provincia an nasabing dakulang pagtiripon asin pagkakataon man kuta na ini ngani na mas pang mapabaskog an turismo asin ekonomiya kan Albay.

 

An iba man an positibo pa an paghiling sa mga pangyayari asin dakol pa suboot na ibang dakulang event an pwedeng i-host kan provincia.

 

Para man sa iba, tama sana an naging desisyon na isaalang-alang an salvacion kan mga delegado asin dapat suboot na matutukan kan lokal na gobyerno an kapakanan kan mga namamanwaan sa panrarapado kan bagyo.

 


LEGAZPI CITY - Pano ngunyan nin kamunduan an mga Albayano huli sa biglaan na pagbawi sa pag-host kan Albay sa saro sa dakulang event kan taon sa Pilipinas, an Asia Pacific Economic Cooperation Informal Senior Officials Meeting (APEC-ISOM).

 

Ini kasunod naman kan naging desisyon kan 2015 APEC National Organizing Committee na imbes na sa provincia, gigibuhon na ini sa Metro Manila.

 

Apwera sa pagkadismaya ni Albay Gov. Joey Salceda sa nangyari, aminado man ini nav dugo asin pawis na an saindang naging puhunan sa nasabing dakulang pagtiripon.

 

Katakod kaini, nagsayuma ng magtaram pa an Albay Provincial Preparatory Logistical Committee (APPLC) kun pira an kabilugan na nagastos kan provinica para sa APEC preparation, alagad kun babalikan, kan nakalihis na bulan kan hagadon ni Gov. Salceda sa mga miyembro kan Sangguniang Panlalawigan na ire-aligned an nagkapira sa natipid na budget gikan sa ibang departamento ngani na magamit sa iba pang pangangaipuhan na nagkakantidad nin P6.3-M.

 

Apwera pa ini sa enot ng mga isinagibong dry run kan PNP para sa security, training kan mga kabuhan kan Coast Guard, Philippine Navy, Philippine Airforce, asin iba pang concerned personnel ngani na macierto an seguridad kan mga foreign delegates.

 

Sa ngunyan, saro-saro ng pigpapabalik an mga behikulong gagamiton kuta ng convoy na gikan pa sa Metro Manila mantang ngunyan na aldaw, ipupull-out naman an mga maserbi kuta na sa mga hotels kun saen gigibuhon an mga meeting asin maistar an mga bisitang dayuhan.

 

Balik naman sa normal sa masunod na kalse an kalse sa gabos na lebel sa provincia.

 

Marurumduman na planong ipautob an 2-day suspension sa mga banwaan kan . Domingo, Daraga asin cuidad kan Legazpi huli sa nasabing pagtitipon.

 


LEGAZPI CITY - Sa kabila kan naging desisyon kan 2015 - APEC National Organizing Committee na ilipat na sana sa Metro Manila an Asia Pacific Economic Cooperation Informal Senior Officials Meeting (APEC-ISOM) imbes na sa Albay, nagpapasalamat pa man liwat ngunyan an gobernador kan provincia.

 

Segun kay Albay Gov. Joey Salceda, dawa nma haros duwang taon nindang pinagprepararan , ginastusan asin pinag-isipannin marhay para sa marhay na pag-akomodar asin pag-istimar sa mga darakulang opisyal gikan sa 19 mga nacion apwera pa sa tulong darakulang business groups, , dakol suboot an naukudan kan mga Albayano asin mismong sinda na nangenot sa APEC preparation.

 

Segun digdi, dapat nang mag move-on an gabos alagad dae man kaini nalikayan an labing pagkadismayar asin panghihinayang.

 

Kasunod kan paglilipat kan venue, marikas man an deactivation kan pwersa na enot ng nag-abot sa provincia para sa amay na pagpepreparar.

 

Sa ibong na lado, gari man dae man uminubra an gobernador kay 'Hagupit' huli sa pangyayari.

 

Marurumduman na plinano na kutang kanselaron an APEC-ISOM kan nakalihis na bulan nin Setyembre makalihis na iitaas sa alert level 3 an status kan Bulkan Mayon alagad huli sa mga pagpapaliwanag ni Gov. Salceda, nakumbinser kaini an organizing committee.

 

Kun babalikan, mismong si Department of Foreign Affairs (DFA) Deputy Director Gen. Ma. Angelina M. Santa Catalina an nagpahayag kun nata napili an provincia kan Albay sa pag-host kan nasabing international event.

 

Ini huli suboot sa "vitality asin dynamism' kaini, pag-abot sa mga development sa ibong kan manlaen-laen na kalse nin kalamidad na pigkakahampang kabale na an bagyo asin pagsabog kan bulkan.

 


LEGAZPI CITY - Labi ngunyan an pagkadismaya kan mga Albayano makalihis na dagos na kanselaronm an nakatalaan na Asia Pacific Economic Cooperation Informal Senior Officials Meeting (APEC-ISOM) na gigibuhon kuta na sa provincia sa masunod na semana.

 

Kasunod ini kan huma ni 'Hagupit' o typhoon Ruby sa paglaog sa Philippine Area of Responsibility.

 

Sa mensaheng ipinaabot ni Albay Governor Joey Salceda, sinabi kaini na sa Metro Manila na sana gigibuhon an nasabing dakulang pagtiripon imbes na sa Albay, huli ini sa posibleng pagtama o mamatean na mga pagbaha na dara kan nasambitan ng raot nin panahon.

 

Segun kay Albay Public Safety and Emergency Management Office (APSEMO) Head Cedric Daep, sa ngunyan, kun sinda man an may gigibuhon na preparasyon, iyu an an para na sa posibleng pagtama o epekto ni Hagupit.

 

Napag-araman na pi-null-out na an gabos na behikulo na gagamiton kuta na para sa convoy kan mga foreign deligates na maabot sa masunod na semana asin balik naman sa Metro Manila para ma-augment sa mga lugar na posibleng tamaan kan raot nin panahon.

 

Sa kabilang dako, aminado man si Gov. Salceda na nadismaya siya sa biglaan na desisyon asin pagbabago kan venue.

 

Segun digdi, halos duwang taon kaining pinaghandaan an nasabing pagtiripon na sarong dakulang tyansa asin prebilihiyo sa provincia asin pinaka-dakulang event na mangyayari sa Albay.Siring man, segun kay Salceda, dakol man suboot na naukudan an mga Albayano sa nangyari.

 

An APEC-ISOM an nakatalaan na gibuhon kuta na sa Desyembre 8-9 sa masunod na semana.

 

Sa ngunyan, nakatutok na asin naka-alerto an gabos na mga LGUs sa mga lakdang ngani na pagprepararan an paparaning bagyo asin liwat na macierto na makukua kaini an zero casualty goal urog pa na pigsasabing makusog man an nasabing bagyo asin dae narayo sa bagyong Yolanda.

 

Christmas Village, pigdadayo sa Naga City

Tuesday, 02 December 2014 15:19

NAGA CITY- Nilalaoman an pagbulos ngonian kan mga tao sa syudad nin Naga makalihis na pormal nang bukaan an "Kamundagan Festival."

 

Kasabay kaini, binukaan na man an Christmas Village sa Plaza Quezon kun saen maheheling an manlaen-laen na makolor na ilaw asin musika.

 

Maheheling man digdi an sarong life-size belen asin mga darakulaon na Sta. Claus na may kaibanan na drumer boys.

 

Ngalas-ngalas man an mga tao sa Christmas village na an winter an tema.

 

Maheheling digdi an mga harong asin pine tree na napapatos nin nyebe.

 

Igwa man nin sarong giant Christmas tree na nagseserbing center of attraction huli sa gayon kan kolor na gikan sa laog kaini.

 

An mga puon nin kahoy sa palibot, pano man nin mga nakasabit na parol na garo bituon na kolor bulawan asin berde.

 

Igwa man nin hilera kan mga arko na igwang dekorasyon na mga Christmas lights.

 

Bukas an nasambitan ng Christmas village puon alas 5:00 nin hapon hasta alas 12:00 nin matanga.

 

Sa entrevista kan Bombo Radyo Naga ki Fara Bongat, event head asin first lady ni Mayor John Bongat, sinaysay kaini na maogma su boot siya sa naheling niyang reaksyon kan mga tao sa nasambitan ng Kamundagan Festival huli ta ini su boot an katuyuhan kan nasambitan ng event.

 

Mientras tanto, nilalaoman man na may mga surpresa pang itatao an lokal na gobyerno kan syudad kasabay kan aktibidad.

 


LEGAZPI CITY--Maswerteng mayong nalugadan asin nagadan sa nangyaring pananambang kan mga rebeldeng New People's Army sa tropa kan militar sa porsyon kan Brgy. Morera sa banwaan kan Guinobatan, provincia nin Albay.


Segun kay Col. Perfecto Pe├▒aredondo, commanding officer kan 2nd Infantry Battalion, pasiring kuta an mga suldados sa syudad nin Legazpi ngani na mag-atendir sa sarung meeting kan bigla na sana man na paputukan kan mga rebelde an piglulunadan kaining Korean-made (KM) truck.


Segun digdi, dae na nagbalos pa nin putok an mga militar huli na man sa rikas kian dalagan kan nasabing sakayan sakay an sarung team kan mga suldados na kompwesto nin pokiu mas o menos sampulo katawo.


Makalihis an insidente, narekober sa lugar an sampulong bala nin M-16.


Sa ngunian, padagos an pinagigibong operasyon kan militar kontra sa mga rebelde makalihis an sunod-sunod na pagsakyada kan mga ini sa manlain lain na porsyon kan rehiyon.


Mrurumduman na kaini sana man na nakalihis na Dominggo kan ultimong an mag inibong na lado sa porsyon kan Brgy. Bololo sa parehong banwaan mantrang Nobyembre 28 man kan mangyari an pagsakyada sa temporary patrol base kan militar sa porsyon kan Brgy. Maopi sa kataid na banwaan kan Daraga.


Apwera kaini, naging sunud-sunod man an pambabadil-gadan sa mga pagtaraid na provincia kan Sorsogon na pigtutukdong kagibo kan mga rebelde siring man an panghaharass sa nagkapirang mga residente sa Masbate na enot nang inapod na 'terorismo' kan mga militar.

 


LEGAZPI CITY -- Nagkakaigwa ngunyan nin dayalogo sa pagultanan kan sinuspendeng Mayor asin Vice Mayor na paramientras na matukaw na chief executive kan Bulan Sorsogon.


Sa intrevista kan Bombo Radyo Legazpi kay P/S Supt. Bernard Banac kan Sorsogon Police Provincial Office, pinangenutan ni Gov. Raul Lee an nasabing dayalogo huli naman sa pagsayuma ni Mayor Marnielle Robles na magbaba sa saiyang pwesto.


Segun digdi, piglilikayan ninda na mas maglala pa an sitwasyon kaya man nakaposisyon na an mga pulis ngani na magtener na matoninong an mga supporters kan mag-inibong na lado.


Sa ngunyan kaya, may mga supporters an nagsasagibo nin mga pagtiripon sa luwas kan munisipyo bilang pagpapahiling nin suporta sa sinuspendeng alkalde asin Vice mayor kan banwaan.


Marurumduman na sinuspende kan Sangguniang Panlalawigan si Mayor Robles huli sa suboot pagiging guilty kaini sa pag-abuso sa saiyang poder kabale na an kasong culpable violation of the Constitution, dishonesty, oppression, gross negligence asin grave abuse of authority kun saen ginamit suboot kaini an pondo kan banwaan sa pag-aadal kan saiyang mga aki asin an pagsayuma kaini na bayadan an retirement asin terminal leave benefits kan mga dating opisyal asin empleyado kan lokal na gobyerno.


Apwera digdi, nahahampang man si Robles sa recall election na liwat na pinabukasan kan Commission on Elections kan nakalihis pa sana man semana.


LEGAZPI CITY -- Nakaalerto na ngunyan an mga awtoridad katakod kan posibleng urog pang pag-init kan tensyon sa pagultanan kan mga tagasuporta asin kalaban kan sinuspender na akalde kan Bulan sa provincia nin Sorsogon.


Ini an kasunod kan pormal na pag-tukaw kasuudma ni acting Mayor Patricia "Tessie" Guran makalihis ining pormal na pasumpaon sa posisyon ni Gov. Raul Lee.


Enot digdi, nanindugan si dating Mayor Marnellie Robles na dae ini maali sa pwesto sa ibong kan suspension order gikan sa Sangguniang Panlalawigan huli na man sa saiyang isinangat na apelar sa Office of the President asin maging an padagos na suporta kan saiyang mga namamanwaan.


Katakod kaini, naninindugan man an administrator kan banwaan na si Jamer Honra na dae pwedeng paalion si Robles sa posisyon base sa Administrative Order 22 s. 2011.


Si Robles an nahahampang sa kasong 'culpable violation of the Constitution, dishonesty, oppression, gross negligence asin grave abuse of authority kun saen ginamit soboot kaini an pondo kan banwaan para sa pag-aadal kan saiyang mga aki asin maging an pagsayuma kaini na bayadan an retirement asin terminal leave benefits kan mga dating opisyal asin empleyado kan lokal na gobyerno.


Apwera digdi, nahahampang man si Robles sa recall election na liwat na pinabukasan kan Commission on Elections kan nakalihis na semana.


Enot nang nagkainitan an mga tagasuporta kaini asin an bagong tukaw na alkalde kasuudma alagad piglalaoman na urog pang malala an tensyon ngunyan na aldaw sa paglaog ni Guran sa saiyang opisina.

Contact Us

  • Address: 2406 Nobel corner Edison Streets, Makati City Philippines
  • Tel: +(632) 843 0116
  • Fax: +(632) 843 0116
  • Email: This email address is being protected from spambots. You need JavaScript enabled to view it.