You are here: HomeRegional NewsBicolano

LEGAZPI CITY- Nagtetenir na kalmado maski igwang nai-ekspeyensyahan na abnormal na aktibidades sa palibot kan Bulkang Bulusan.

 

Base sa pinakahuring resulta kan seismic monitoring kan bulkan, nairehistro an 10 pagyugyog sa nakalihis na 24 oras.

 

Nagbaba man an sulfur dioxide emission kaini sa 43 tonelada kada aldaw puon kan Nobyembre 7.

 

Dae man naobserbahan an anumang steaming activity huli sa nakatahob na mga panganuron na nagbabanta nin makusog na paguran sa bandang tuktok kan bulkan.

 

Padagos an pag-alerto kan Phivolcs sa mga residente na harani sa lugar na mag-ingat sa mga dae piglalaomang phreatic eruptions sa Mt. Bulusan.

NAGA CITY- Arestado kan mga otoridad an 14 persona makalihis na maaktuhang iligal na nagsusugal sa ciudad nin Lucena.

 

Sa nagunong impormasyon kan Bombo Radyo Naga, napag-araman naaktuhang nagkakawat nin mahjong asin tong-its an 14 mga kalalakihan sa sarong harong sa Barangay Ibabang Dupay sa nasambitang ciudad.

 

Nakumpiskar sa mga suspek an manlaen laeng mga gambling paraphernalia asin kwartang nagkakantidad nin P1,648 na nagseserbeng taya kan mga ini.

 

Nagtitinir na ngonyan sa kostudiya kan mga otoridad an nasambitang mga suspek mantang pig-aandam na an kasong isasangat laban sa mga ini.

NAGA CITY- Ginadan na, pighabunan pa an sarong incumbent barangay kagawad sa Sipocot, Camarines Sur.

 

Pigbisto an biktima na si Primo Belleza, 57-anyos asin sarong incumbent kagawad kan barangay Carayrayan.

 

Sa pakikipag-olay kan Bombo Radyo Naga ki SPO3 Albert Joven hale sa Sipocot PNP, sinaysay kaini na nadukayan na sana an mayo ng buhay na lawas kan biktima na nakabulagta sa tinampo kan sarong Larry Borbor kan pauli na ini sa saindang harong.

 

Igwang tama nin bala kan badil asin pigtaga pa suboot an biktima na nagresulta sa kagadan kaini.

 

Sigon ki Joven, dae ninda mahanap sa ngonyan an bag kan nasambitang biktima na pigsasabing naglalaog nin kwartang nagkakantidad nin P20,000 asin cellphone.

 

Pighihiling kan mga kapulisan an posibilidad na bistado kan biktima an suspek sa nangyaring panghoholdap.

 

Nagpapadagos pa hasta sa ngonyan an imbestigasyon kan mga otoridad tanganing madakop an nagdulag na suspetsado.

NAGA CITY- Garu nagpadangog ngonyan an lado kan bagong gobernador kan Camarines Norte na si Jonah Pimentel na maghale na man an mga empleyado na pigbugtak sa pwesto kan dating gobernador kan probinsya na si Edgardo 'Egay' Tallado.

 

Sa sarong pakikipag-olay ki Atty Mike Pajarillo, pinsan asin abogado ni Gov. Pimentel, sinaysay kaini na dapat kusa ng maghale na sana an mga co-terminus na mga empleyado ni Tallado sa kapitolyo asin dae na paghalatong haleon sinda sa saindang mga pwesto.

 

Sigon sa sainda, obheto kan lakdang na ini kan bagong gobernador na masiertong tapat an mga empleyado kan kapitolyo sa saiya.

 

Yaon naman suboot sa kamot ni Pimentel kun magkakaigwa nin pag-reshuffle sa mga empleyado sa provincial government.

 

Sigon pa ki Pajarillo, pwedeng ibwelta ni Pimentel an mga mahaleng empleyado sa kapitolyo kun pigtitiwalaan niya an mga ini.

 

Posible man suboot na magpaluwas nin memorandum si Pimentel tanganing ibwelta man an mga empleyado sa kapitolyo na pighale sa pwesto kan nakalihis na administrasyon.

 

Mientrastanto, piglinaw ni Pajarillo na full pledge ng matukaw komo gobernador si Pimentel asin bise-gobernador man an top board member na si Mike Canlas kan probinsya.

 

Ini makalihis na pormal na iserbe kan Department of Interior and Local Government (DILG) -Bicol an dismissal order laban ki Tallado kan nakalihis na aldaw.

NAGA CITY- Palaisipan ngonyan an pagkagadan nin sarong lalaki na nadukayang nagpapataw-pataw sa Kudong River na sakop kan Barangay Balaynan, Goa, Camarines Sur.

 

Sa inisyal na imbestigasyon kan mga otoridad, napansin suboot ni Barangay Kagawad Rogim Nicol an nasambitang bangkay sa tahaw kan salog kaya man tulos ining naghagad nin tabang sa ibang mga opisyal.

 

Kan mahawas suboot an bangkay, napag-araman na igwa ining tama nin saksak sa daghan na pigtutubudang naging raosn sa pagkagadan kaini.

 

Sa ngonyan, nagpapadagos pa an piggigibong imbestigasyon kan mga otoridad tanganing mabisto an nasambitang biktima.

NAGA CITY- Pighale ngonyan kan Department of Interior and Local Government (DILG)-Bicol an paghandal kan mga empleyado asin residente kan Camarines Norte sa posibleng epekto kan biglaang pagribay nin gobernador sa nasambitang probinsya.

 

Ini makalihis na dagos ng magtukaw komo Gobernador si Vice Mayor Jonah Pimentel makalihis na maiserbe kan DILG an dismissal order ki dating. Gov. Edgardo "Egay" Tallado.

 

Sa pakikipag-olay kan Bombo Radyo Naga ki Eloisa Pastor, Regional Director kan DILG-Bicol, sinaysay kaining mayong dapat na ikahandal an mga empleyado huli naman ta dae makakaulang an nasambitang bagay sa mga on- going transactions sa manlaen laeng opisina kan lokal na gobyerno sa probinsya.

 

Aminado man si Pastor na dawa pigsugo sana sinda kan Office of the Ombudsman alagad magabat para sa sainda an pagseserbe kan nasambitang dismissal order ki Tallado urog na ta dae pa ini nahahaloy poon kan magtukaw ini sa pwesto.

 

Naglalaom man an nasambitang direktor na maserbeng adal ini sa mga government officials sa Bicol tanganing dae na mautro pa sa iba an nangyari ki Tallado.

 

Sa ibong na lado, kampante man an lado ni Tallado na dae pa nagtatapos an laban kan dating gobernandor makalihis na magsunad nin Temporary Restraining order tanganing i-apela an pigbabang dismissal order kan Ombudsman laban sa opisyal.

 

Kun marurumduman, nagpoon an dismissal order ni Tallado makalihis i-dismiss kaini an nagkakapirang empleyado kan provincial government sa Camarines Norte.

LEGAZPI CITY- Panibagong personalidad na naman an dugang sa listahan kan mga nagagadan na suspek na imbwelto sa ipinagbabawal na bulong.


Ini makaliohis an isinagibong operasyon kan kapulisan sa banwaan kan Camalig sa Albay.


Binisto ining si Ramon Niebres alyas Randy, 49 anyos kan P-4 Brgy Tinago, sa nasambit na banwaan.


Nagbalo suboot na manlaban an nasabing suspek kun kaya nauli sa ribayan nin putok an operasyon sa lado ni Randy asin kan Camalig MPS.


Nagsapar nin tama sa hawak an suspek na tulos idinalagan sa patrol car ng pulisya alagad dae na nagibo pang makaabot sa ospital nin buhay.


Base sa pinakahuring datos kan Police Regional Office 5, duwa na an nagagadan sa mga drug operations sa mas pinabagsik na Oplan Double Barrel Alpha puon Oktubre 26 hasta Nobyembre 10 mantang labi 8, 000 naman an nagsuko sa pulisya.

LEGAZPI CITY- Dae makapanubod an sarong babaye makalihis magin biktima kan Budol-budol sa sadiring lugar.


Binisto ining si Magie Vargas, 33 anyos na residente kan Purok 7, Tuburan, Ligao City.


Sa nagunong impormasyon, igwa suboot ining namidbidan na sarong babaye asin lalaki na nagpanggap na naghahanap kan lugar na dadarhan kan mga seafoods.


Sinugo kan mga ini an biktima na magpaduman sa Ligao Shell Station dara an sarong olive green na paper bag.


Naging malabo na suboot an mga sunod na pangyayari kaya hudyan na kan mapag-araman ni Magie na nadara kan mga mga estranghero an P10,300 cash asin sarong cellphone na nagkakantidad P3,300.


Kan bulatlaton man an laog kan paper bag, tuminambad sa biktima an mga ginunting na dyaryo.


Padagos pa an imbestigasyon manungod sa insidente.


Mientras tanto, inabisuhan man an publiko na magtenir na alerto asin dae tulos na magtiwala sa mga tawong kabibisto pa sana urog nang harani na an kapaskuhan.

LEGAZPI CITY- Liwat na pinatotoohan kan sarong Bicolano an orag asin tibay makalihis makua an top spot sa kakatapos pa lang sanang November 2016 Midwifery Licensure Examination.


Ini makalihis na maguno kan tubong Casiguran Sorsogon na si Maribel Doroja Sabenia kan Estenias Science Foundation School (ESFS) an pinakahalangkaw na exam rating na 90.1%.


Alagad bako man sana si Sabenia an solamenteng Bicolano si Sabenia na laog sa Top 10, kasabay man digdi sinda Sheila Berja Subion kan Catanduanes State University na nasa ika-apat na pwesto sa 89.15% grade mantang nasa top 6 si Kathrina Mae Rafael Endrano kan Naga College Foundation sa 89.05 percentage.


Sa 3,085 na nagsairarom sa nasambit na eksaminasyon, 1, 572 an matrayumpong nakapasar.

LEGAZPI CITY- Kasunod kan nakatalaang selebrasyon kan Kapaskuhan nagpaluwas nin patanid an Bureau of Fire Protection Bicol sa publiko na maging responsable tanganing maibitaran an kasulo.


Abiso kan BFP na magbakal sana nin mga Christmas lights na nakapasar sa tamang pag-aadal sa paagi kan paghiling sa mga label kun igwang ICC sticker asina susog sa polisiya kan Department of Trade & Industry, dapat man na ibitaran an pagkakaigwa nin octopus wiring asin overcharging tanganing makaiwas sa peligro.


Aminado an BFP sa paglangkaw sa numero kan mga insidente nin kasulo sa Ber months kawsa kan electrical short circuit huli sa mga depektibong pailaw asin iba pang appliances.


An pahayag na ini kan ahensya ginibo katakod kan naerehistrong kasulo sa Caramoan, Camarines Sur kun saen naabo an sarong residensya asin 4 tindahan na nagwalat nin 1 milyon pesos na danyos sa propriedad.

Contact Us

  • Address: 2406 Nobel corner Edison Streets, Makati City Philippines
  • Tel: +(632) 843 0116
  • Fax: +(632) 843 0116
  • Email: This email address is being protected from spambots. You need JavaScript enabled to view it.