You are here: HomeRegional NewsBicolano

NAGA CITY- Pigtapos na suboot suodma an search and rescue operation sa nawawarang parasira sa probinsya nin Camarines Norte.

 

Sigon sa impormasyon hale sa Philippine Coast Guard, sinaysay kaini na pigpa-untok na suodma an nasambitang operasyon tanganing hanapon an parasira na si Salde Reyes na haros walong aldaw ng nawawara sa kadagatang sakop kan banwaan nin Vinzons.

 

Hasta suodma na sana suboot an mission order kan duwang helikopter na hale sa Office of the Civil Defense (OCD) tanganing magtabang sa operasyon.

 

Hasta sa ngonyan, dae pa suboot nakukua an lawas ni Reyes.

 

Sigon sa PCG dawa na pigtapos na ninda an search and rescue operation suodma, padagos pa nanggad an saindang pakikipagtabangan sa mga parasira sa lugar siring man sa mga opisyal sa coastal barangay sa Camarines Norte enkaso mahiling kan mga ini an lawas kan nasambitang parasira.

 

Marurumduman na naraot an piglulunadang baroto ni Reyes kaibanan an nakasalbar na si Arnel Era makalihis na rapaduhon ini kan makukusog na hukol kan Enero 9.

(UPDATE) NAGA CITY- Piggamit suboot na pambayad kan suspek an iligal na droga tanganing makipagdurog sa menor de edad na narescue sa laog kan hotel sa ciudad nin Naga.

 

Sa entrevista kan Bombo Radyo Naga ki PS/Supt. Julius Muñez, city director kan Naga City Police Office (NCPO), sinaysay kaini na shabu an pigbayad kan nadakop na suspek na si Rolando Salceda sa 16-anyos na menor de edad tanganing magdurog suboot sinda sa laog kan Sampaguita Tourist Inn sa nasambitang ciudad.

 

Marurumduman na narekober ki Salceda an apat na sachet kan pigtutubudang shabu.

 

Apwera man suboot sa 16-anyos na biktima, naisalbar man kan mga kapulisan an tolong iba pang mga menor de edad sa manlaen laeng hotel sa ciudad.

 

Naarestar man an 18-anyos na suspek na nagseserbeng bugaw kan mga menor de edad.

 

Sigon ki Muñez, nahahampang sa kasong pagbalgar sa RA 9165 o an comprehensive dangerous drugs act of 2002 si Salceda na nakuanan nin iligal na droga mantang susunadan man nin kaso an 18-anyos na bugaw.

LEGAZPI CITY- Nagkondusir nin Turn-over Ceremonies sa mga Hepe kan limang banwaan sa probinsya kan Sorsogon sa Kasanggayahan Hall, Camp Salvador Escudero Sr, syudad kan Sorsogon.

 

An nasambit na balasahan an napagdesisyunan huli sa nakatalaan na paghali kan mga ini ngani na mag-adal o schooling asin naabot na an pinaka haloy na pagtetenir kan sarong hepe sa lugar.

 

Segun sa NAPOLCOM Memorandum Circular memorandum number 2012-11, an sarong hepe an kinakaipuhan na magtenir sa saiyang nasasakupan na dae malagpas sa duwang taon.

 

Kaibanan sa mga nasalidahan an hepe kan banwaan kan Barcelona, Casiguran, Castilla, Magallanes asin Pilar, Sorsogon.

LEGAZPI CITY- Ipigtalagang bagong chairman kan Regional Peace in Order Council (RPOC) sa bilog na Bicol si Legazpi City Mayor Noel Rosal.

 

Mismong si Presidente Rodrigo Duterte an nag-appoint ki Rosal sa nasambitan na posisyon sa bisa na man kan rekomendasyon ni DILG Sec. Ismael "Mike" Sueno bilang Chairperson kan National Peace and Order Council (NPOC) katakod kan nakalaag sa Executive Order No. 773, s. 2009.

 

Mientrastanto, maikokunsiderar man na parte kan historya sa rehiyon an responsibilidad na itinao ki Rosal huli ta ini an pinaka enot na beses an saong alkalde an nagkapot sa posisyon.

 

Pano man nin kumpiyansang inako kan alkalde an posisyon.

NAGA CITY- Ikinabigla ni Vice President Leni Robredo an sitwasyon kan Bicol urog na an probinsya nin Camarines Sur makalihis an pagbisita kaini sa banwaan kan Ocampo kasubagong aga.

 

Sigon ki Vice President Robredo, dae niya piglalaoman na mas grabe pa sa saiyang paghuna an danyos na pigsapo na nasambitan ng probinsya sa panlalama sa kan Bagyong Nina.

 

Maraot soboot an boot kan bise presidente huli ta sa panahong pigrarapado kan bagyo an rehiyon, mayo siya sa taed kan saiyang mga kababayan.

 

Pigklaro man kaini na pinirit man kuta na niyang makapuli para damayan an mga Bicolano alagad 'malas' soboot ta dae siya nakakakua nin flight papuling Pilipinas.

Sa ibong kaini, tinawan duon kan opisyal na dae man nagpabaya an Office of the Vice President sa pagsimbag sa mga pangangaipo kan rehiyon makalihis an pagtama kan nasambitan ng kalamidad.

 

Kung marurumduman, kasabay kan panlalamasa kan bagyong Nina sa Bicol, nasa Estados Unidos man an Bise Presidente makalihis mag-atendir sa sarong family reunion.

Mientrastanto, apwera sa Camarines Sur, nakatalaan man na bisitahon kan opisyal an probinsya nin Albay asin Catanduanes na labi man na naapektaran kan nag-aging bagyo.

NAGA CITY- Lugadan an sarong Barangay Official makalihis pagbabadilon sa Barangay Capacuan, Paracale, Camarines Norte.

 

Binisto an biktima na si Mario Hermogeno, Barangay Kagawad kan nasambitan ng barangay.

 

Sa nagunong impormasyon kan Bombo Radyo Naga, napag-araman na mapuli na kuta an biktima makalihis pakakanon an mga ataman na sira sa saindang fishpond kan mag-abot an suspek na si Fax Macao na armado nin caliber 45 na badil.

 

Sa dae pa maaraman na rason, pinagbabadil kan suspek sa manlaen laen na parte kan saiyang lawas an opisyal na tulos man na ipigdalagan sa ospital.

 

Sa ngunian, pinaghahanap na an suspek na tulos nagdulag makalis an insidente.

NAGA CITY- Napuli sa kamunduan an dapat kuta na maogmang pagsabat sa taong 2017 kan sarong pamilya sa taong 2017 makalihis mag-inom nin lason an sarong ina sa banwaan kan Patnanungan, Quezon.

 

Sa nagunong impormasyon kan Bombo Radyo Naga, napag-araman na nadukayan na sana kan pamilya an lawas kan biktima na nakabulagta sa laog kan banyo mantang kataed kaini an sarong bote na igwa nin laog na liquid sodium cyanide.

 

Pigtugon pa soboot kan biktima sa pamilya kaini na atamanon na sana kan mga ini an saiyang aki.

 

Pigpurbaran pa kuta nang idalagan sa ospital an biktima alagad pigdeklara na ining dead on arrival kan mga doktor.

NAGA CITY- Gadan an padre de pamilya mantang lugadan naman an mag-ina kaini sa nangyaring pangbabadil sa Barangay Poblacion, Sta. Elena, Camarines Sur.

 

Binisto an biktima na si Fernandez Romero, 42-anyos.

 

Sa nagunong impormasyon kan Bombo Radyo Naga, napag-araman na mantang pigbabagtas kan biktima an kalabaan kan tinampo sa nasambitan ng lugar lunad kan tricycle asin kaibanan an saiyang mag-ina kan biglang sabayan kan saro pang motorsiklo.

 

Pinagbabadil kan duwang dae pa nabibistong suspek an biktima na naggin dalan para mahulog an pigmamaneho kaining lunadan sa canal asin nakabangga pa sa post kan kuryente.

 

Tulos man na pigdalagan sa ospital an biktima alagad pigdeklarar na ining dead on arrival kan mga doktor mantang nagsapo naman nin lugad sa hawak an agom asin aki kaini.

 

Sa ngunian, nagpapadagos pa an imbestigasyon kan mga otoridad mantang pinaghahanap na an mga suspek na tulos nagdulag makalihis an insidente.

Tindahan nin gasolina nasulo, Lolo--gadan

Monday, 02 January 2017 16:39

NAGA CITY- Gadan an sarong lolo makalihis makabale sa nasulong tindahan sa Barangay San Antonio, Bombon, Camarines Sur kasubagong aga.

 

Binisto an biktima na si Eldifonso Bellote, 84-anyos.

 

Sa entrevista kan Bombo Radyo Naga ki P/Insp. Breezy Sanchez, OIC-Chief of Police kan PNP-Bombon, sinaysay kaini na pasado alas 3:00 nin maagahon kan magbungkaras an kasulo sa sarong tindahan nin gasolina kunsaen nagtuturog an nasambitan ng gurang.

 

Huli ta gibo sana sa light materials, tulos na naglakop an kalayo kunsaen dae na nagibo pang makaluwas kan biktima.

 

Naghaloy nin haros duwang oras antes dagos na napalsok kan mga tauhan kan Bureau of Protection an nasambitan ng kasulo.

 

Sa ngunian, padagos pa an pigigibong imbestigasyon kan mga otoridad mantang pig-aaram pa kung pira an kabilugang danyos na pigwalat kan nasambitan ng insidente.

NAGA CITY- Arestado an duwa katao na soboot embwelto sa iligall na droga asin online cybersex transactions sa Barangay Gulang-Gulang, Lucena City.

 

Binisto an mga suspek na sinda Ricardo Revilla Jr., 29-anyos asin Jericho Deligente, 33-anyos.

 

Sa nagunong impormasyon kan Bombo Radyo Naga, napag-araman na naaktuhan kan mga otoridad an duwa na nagagamit nin iligal na droga sa laog kan sarong harong sa nasambitan ng lugar.

 

Apwera sa nasambitan ng mga droga, nakumpiskar man kan mga pulis an mga drug paraphernalia, manlaen laen na klase nin sex toys asin cybersex materials.

 

Sa ngunian, nagpapadagos pa an imbestiogasyon kan mga otoridad mantang pig-aaram naman kung embwelto talaga sa cybersex transactions an mga suspek sa nasambitan ng lugar.

Contact Us

  • Address: 2406 Nobel corner Edison Streets, Makati City Philippines
  • Tel: +(632) 843 0116
  • Fax: +(632) 843 0116
  • Email: This email address is being protected from spambots. You need JavaScript enabled to view it.