KALIBO, Aklan - Nakalista it 547,931 nga tourist arrivals sa isla it Boracay sa naunang napueong buean it makaron nga dag-on.

Raya hay base man sa pinakaulihing data nga gin paguwa it Municipal Tourism Office.

Sa nasambit nga numero, 368,968 kara ro nailistang domestic arrivals samtang ro foreign arrivals hay 28.90 per cent ukon katumbas it 158,112 it kabilugan nga tourist arrivals.

20,851 man ro nailistang arrivals halin sa mga Overseas Filipino Workers maghalin ku buean it Enero hasta it Oktubre.

Suno sa report nga sa kabilogan nga 158,112 nga foreigners nga nag bisita sa Boracay, 36.10 per cent ukon 57,018 sa mga raya hay Koreano nga gin sundan man it Chinese nga nakalista it 23,902 ag mga Taiwanese nga may 18,659 tourists.

Ro nasambit nga mga kaiping nga nasyon it Pilipinas hay may kada Domingo nga chartered flights sa Kalibo International Airport nga gina halinan it 63 per cent it total foreigners sa isla it Boracay ukon 99,579 arrivals.

Mag eowas sa mga raya, nakalista man it 10,162 arrivals sa parte it mga Amerikano nga gin sundan it mga taga Hong Kong nga may 5,616 tourist arrivals, United Kingdom, Australia, Japan kamana man it German tourists.