Opening Salvo para sa Dinagyang Festival 2019, nangin matalunsay suno sa PSTMO

ILOILO CITY–Nangin matalunsay ang ginpatigayon nga Opening Salvo para sa Dinagyang Festival 2019.

Sa interview sang Bombo Radyo kay Jeck Conlu, pinuno sang Public Safety and Transportation Management Office (PSTMO), iya ginpahayag nga pasado alas 6:00 sang hapon kahapon, gilayon naman nga ginbuksan ang mga dalanon sa City Proper Area agud nga maka-agi na ang mga motorista.

Samtang ginapatigayon ang Opening Salvo, wala man sang may narecord nga major incidents magluwas lamang sa paggutok sang mga tawo sa dalanon sa syudad.

Bangud nga ginpasirado ang dalan Muelle Loney kag pila ka mga access road sa syudad, naggutok naman ang trapiko sa Diversion Road sa distrito sang Mandurriao kag sa distrito sang Jaro bangud sa traffi re-routing nga ginpatuman.