KALIBO, AKLAN -- Ginaeauman it Sangguniang Panlalawigan nga maaprubahan eon sa third ag final reading ro ordinansa angot sa Children’s Code sa Aklan sa masunod nga regular session .

Suno kay SP member Daisy Briones , principal author it nasambit nga proposed ordinance nga gin-endorso eon it tatlong komitiba nga ginaeakipan it women , family , welfare and children , laws , rules and ordinances ag health and social services para sa pag-apruba it Children’s Code .

Tuyo it nasambit nga code nga masiguro ro proteksyon it mga inunga kontra sa mga pagpang-abuso ag exploitation kamana man nga mapatuman ro andang kinamatarung ag ma-promote ro andang kamaeayran ag development .

Ginpahayag ni SP member Selwyn Ibarreta nga magataeana ro probinsiya it inisyal nga pondo nga nagabalor it P1-million nga pagaboe-on halin sa 20 porsyento it Internal Revenue Allotment (IRA) para sa publication it implementing rules and regulations , training ag orientation it stakeholders ag promotion it nasambit nga code sa publiko .

Sa idaeaum it proposed ordinance , magatukod it Desk for Children’s Concerns ro Office of the Provincial Social Welfare and Development .

Madumduman nga sa sangka pagtuon nga ginpatigayun ko 2006 it End Child Prostitution Pornography and the Trafficking for Sexual Purposes (ECPAT) Philippines , napamatud-an nga may pilang mga menor de edad sa isla it Boracay nga nagabaligya it andang eawas .