ILOILO CITY - Isinailalim sa interogasyon ng mga tauhan sa bahay ni Iloilo Gov. Niel Tupas Sr. ang isang photojournalist sa Iloilo matapos maaktuhang kinukunan nito ng larawan ang mansyon ng mga Tupas sa distrito ng Jaro.

Ayon kay Provincial Administrator Manuel Mejorada, nagduda at nabahala ang mga tauhan ng gobernador sa ginawa ng photojournalist na si Tara Yap dahilan kung kaya't isinailalim ito sa interogasyon.

Subalit pinalaya rin ito matapos magpakita ng kanyang identification card na miyembro ito ng media.

Ayon kay Mejorada, si Yap din ang kumuha ng larawan ng mga heavy equipment ng provincial government na nakahimpil sa harap ng bahay ng gobernador sa bayan ng Banate, Iloilo na pinaniniwalaang ginamit sa construction ng nasabing bahay at ngayon iniimbestigahan na ng sangguniang panlalawigan.

Naniniwala naman si Mejorada na nagsisilbing spy umano ni Iloilo 4th District Rep. Ferjinel Biron si Yap para siraan ang pangalan ng gobernador na lalaban sa kanya sa pagiging congressman sa halalan sa susunod na taon.