Gloria ArroyoTodo-higpit na ang seguridad sa palibot ng Pasay City Hall of Justice simula pa kaninang madaling araw para sa arraignment ng dating pangulo at ngayon ay Pampanga Rep. Gloria Macapagal-Arroyo.

Ayon kay National Capital Region Police Office (NCRPO) chief Dir. Alan Purisima, bagama't wala naman umanong direktang banta sa seguridad ng dating pangulo, pero nais umano nilang matiyak na maging maayos at mapayapa ang lahat.

Inaasahan din umano ng mga otoridad ang pagtungo sa lugar ng mga taga-suporta ng pro at anti-Gloria groups.

Limitado rin sa media coverage ang pagbabasa ng sakdal sa dating pangulo na nahaharap sa kasong electoral sabotage.

Sa panayam ng Bombo Radyo kay Pasay-RTC Branch 112 spokesperson Felda Domingo, gaganapin ang pagbabasa ng sakdal ganap na alas-8:30 ng umaga sa sala ni Pasay Judge Jesus Mupas.

Nagpatupad na rin ng rerouting ang Pasay City government sa kahabaan ng F.B. Harrison at Arnais Avenue para sa maayos na daloy ng trapiko.

Maliban sa dating pangulo, dawit din sa kaso sina dating Commission on Elections Chairman Benjamin Abalos, dating Maguindanao election supervisor Lintang Bedol at dating Maguindanao Gov. Andal Ampatuan Sr.

Ang kaso ay kaugnay sa sinasabing malawakang dayaan na nangyari sa nakalipas na 2007 mid-term elections.