Ybanag News

TUGUEGARAO CITY - Tadday nga assitay y netabbo ta simban ta Brgy. San Gabriel, Tuguegarao City.

Ta interview na Bombo Radyo, kinagi ni Fr. Danny Ulep, parish priest na Sto. Niño Church nga tadday ta sakristan da y nakasita ta tadday nga plastic bag nga igga nakaikwa nga karton na sapatu nu anni ay nepay da taw y assitay nga matantiya nga igga ta lima adde annam nga vulan.

Turi olu ay abbo da nu basura y nepay ta plastic bag ngamme iningan yaw da Fr. Ulep nga maddaggun nga mapprepara ta 1st mass turi liggu megafu ta igga y tura na ta utun na karton nga makkiddaw ta pammakoma anna pabor ta pari nga bendisyonan na yaw.

Tantiya na pari nga y yema y nangitabbo ta fetus ta lawan na simban megafu ta ergo na nga "Daddy" nga nagangwa ta nakagi nga tura.

Daddamman gapa ni Fr. Ulep megafu ta nakaekwa ta tura nga ayayatan na y fetus ngamme ari na nga tinolay nu anni ay nesadya da nga laffutan.

Kinadiyanan gapa na pari y ari paga nga namwan nga suspek ta pangitabbo da ta assitay na tadday nga lalaki nga makkiddaw ta pammakoma ta Diyos anna ari laman ta ana da megafu ta dakal nga nalliwatan yaw.

Base kanni Fr. Ulep ina na pulisya y assitay anna netanam ta pampubliko nga sementeryo na Ciudad na Tuguegarao ta kabalin nga mabendisyonan yaw.

Kinondena gapa na simban nga anniman y rason ta pappatay ta nakagi nga assitay ay ari nga excuse para kuwan da yaw megafu ta yaw ay regalo nga maggafu ta Diyos.