Ybanag News

TUGUEGARAO CITY - Nakkiddaw ta uffun kanni presidential adviser on OFW concerns anna Vice President Jejomar Binay y familya na Overseas Filipino Worker (OFW) nga natay ta Kuwait.

Kaya mamwan na familya na OFW nga si Irene Tamo na Brgy. San Francisco, Baggao y firmi nga gafu na pappatay na yaw nemanno ta nadiskubre na paryentes na nga awan tu mata,ngipan,tagang,futu,anna futung nga nakakadde y bangkay na biktima ta Pilipinas.

Ta interview na Bombo Radyo Tuguegarao, kinagi ni Arthur Tamo, tiyuhin ni Irene nga igga paga senyales nga pinaziyyat da y OFW megafu ta igga nasita da nga lamma ana sugat ta baggi na.

Kakkallo ni Tamo y itsura na kanakan na turi vukatan da y lungun na nga awan tu sinnun na.

Mappabalo da nu anniman nga uffun y meddan ni Binay tapenu meddan kannira y hustisya ta pappatay na kanakan na nga nekonsidera ana nga bagu nga bayani ta Nation tam.

Turi Pebrero 2009 paga nga natrabahu si Tamo nga domestic helper ta Kuwait.

Turi Disyembre 28 laman nga namwan na familya y pappatay kanni Tamo ta kabalin nga nakkadda y sirkulasyon na daga anna acute pulmonary edema turi igga ta unak na balay na amo na turi Oktubre 2011 anna turi Enero 11 laman nga nelubbe ta balay da ta Baggao y baggi na OFW.

Ninay ta abroad y 27-anyos nga si Tamo ta ikaya na nga igga panolay na ta tallu ragun nga ana na ta kabalin nga makisinna sa y atawa na.