Waray News

TACLOBAN CITY - Padayon yana an guindudumara nga assesment han Tacloban City Engineering Office ha mga pribado ngan pampubliko nga mga building mahuman nga mahipatik nga may mga dagku nga establishemento, eskwelahan ngan hospital an nakitaan hin mga gutak mahuman an sunod-sunod nga linog kakulop.

Ha pagkikighimangraw kan Engr. Bobby Gabriana han Tacloban City Engineering Office, nakikipag-sumpayan na hira ha mga tag-iya han building para mahibaruan kon ano ng kamutang hini yana.

Pira han guinsisiring nga nakitaan hin mga gutak an 578 mall ngan Gaisano mall ha downtown area, St. Pauls Hospital ha may Imelda St. , samtang guinkikitaan pa guihapon an 2-storey building han Rizal Elementary School ha syudad han Tacloban.

Waray pa naman igpahayag han opisyal kun pira an danyos ha nahitabo nga linog kakulop.

Una hini, nabaraka an pira nga mga residente ngan empleyado han mga establishmento mahuman nga pag-abaton an mga pagbay-ug banda alas- 12 han udto ngan guinsundan pa hin pira nga aftershocks banda alas kwatro han kulop kakulop.

Pira nga mga estudyante, pasyente ha hospital ngan pati mga nagshoshoping ha mall an nagkagawas han abaton an sunod-sunod nga pagbay-ug han tuna.

Subay ha Philvocs, maabot ha pito kabeses nga guinbay-ug kakulop an pira nga parte han Eastern Visayas kun diin magnitude 5.2 an pinakamakusog nga nahipatik han mao nga ahensya.

Guinsisiring naman nga tectonic in origin an hinungdan han mga pagbay-ug.