Waray News

TACLOBAN CITY- Nagpahimatngon an Department of Science and Technology o DOST ha publiko tungod han namalatumat nga abnormal nga pagbuhos hin uran yana nga bulan hin Pebrero partikular na ha Sinirangan Visayas.

Ha nahikay nga impormasyon han Bombo Radyo Tacloban, nakita han mga kausa nga weather beureau stations nga makaka-eksperyensya hin moderate to weaker La Nina phenomenon an bug-os nga nasud pero ha Sinirangan Visayas ngan pira nga parte han Mindanao in magkakamay-ada naman above normal rainfall.

Nabaruan nga posible magkamay-ada hin tropical cyclone nga matarap ha magkadurudilain nga parte han nasud ugsa ini mag-landfall.

An mao nga abnormal nga pagbuhos hin uran yana nga bulan in durante han active northeast monsoon nga guinpakurukusog han kondisyon han La Nina.

Tungod hini, guinpapag-ikmat an publiko nga sakop han mga lugar nga syahan na nga naapektuhan hin mga pagbaha ngan landslides hadin mga nakalabay nga bulan.

Samtang an pira naman nga buhatan han gobyerno in nangangandaman na guihapon sugad nala han Department of Agriculture agud malikayan an duro nga pagkadistroso han mga pananom.