Waray News

TACLOBAN CITY - Nahitaas yana an ihap han may typhoid fever dinhi ha probinsiya han Leyte.

Sumala kan Boyd Cerro, Centenel Nurse han Department of Health (DoH) Region VIII, nakakaalarma na an padayon nga paghitaas hin kaso hin typhoid fever dinhi ha Leyte. kon diin, upat nga bungto an apektado hini.

Kaupod han mga bungto an Carigara, Capoocan, Tunga ngan Barugo, Leyte.

Dugang pa ni Boyd Cerro, an Carigara Leyte an may pinakahitaas nga may kaso han nasabi nga sakit tungod nga naabot na ha 102 nga residente an naigo hini han mao nga lugar.

Labot la ha upat nga mga bungto, may mga pasyente guihapon nga apektado hin typhoid fever an nakaconfine ha mga hospital han Tacloban.

Ha inisyal nga imbestigasyon han DoH-8 nagawas nga mahugaw nga water source an hinungdan kon kay ano naapektuhan hin typhoid fever an mga residente han upat nga bungto.

Guinpahimatngunan naman ni Cerro, an mga residente han mga apektado nga lugar nga kinahanglan magin malimpyo ha kalugaringon ngan ha kalilbungan agud mak alikay han mao nga sakit. 

Pira han mga sintomas hini nga sakit an pagkakaada hin hiranat nga nahagos hin tulo kaadalaw ngada hin tulo kasemana, paguro-uro, pagul-ol han ulo ngan kalalwasan ngan kadam-an han naaapektuhan  hini an mga kabataan tungod han maluya nga resistensiya.

Samtang, waray pa naman nahireport nga namatay tungod han mao nga sakit han nasabi nga nga probinsiya.