Waray News

TACLOBAN CITY - Patay na han makit-an an usa nga babaye nga paropanlimos ha Brgy 3 Upper Nula-tula, dinhi ha syudad han Tacloban.

Nakilala an patay nga lawas nga hi Natividad "Nating, Malate Cajepe, 47 anyos, ngan residente guihapon han mao nga lugar.

Hi Nating, in waray guinkikilala nga pamilya dinhi ha syudad han Tacloban.

Subay ha nakuha nga impormasyon han Bombo Radyo Tacloban, tumawag ha mga pulisya an barangay captain han mao nga lugar agud ipasabot nga may nakita nira nga patay nga lawas hin usa nga babaye.

Nagtotoo naman an pira nga residente han mao nga lugar nga namatay an mao nga paropanlimos tungod nga maiha na daw ini nga may karamtang ha panlawas.

Ha pagkayana, iniimbestigaran pa han mga otoridad an hinungdan han pagkamatay han mao nga babaye.