KORONADAL CITY- Isa ka candle lighting ceremony ang igapatigayon subong nga adlaw sa siyudad sang Kidapawan kadungan sa pagdumdum sang ika-27 nga bulan matapos nagluntad ang Maguindanao massacre sang Nobyembre 23, 2009.

Ang nasambit nga candle lighting ceremony ang pagapamunuan sang grupo nga National Union of Journalist of the Philippines (NUJP) Kidapawan chapter.

Magluwas diri, pila ka pamilya sang mga biktima sang masaker ang magabisita sa lulubngan sang ila mga nagkalamatay nga mahal sa kabuhi.

Kadungan sini, hustisya sa gihapon para sa ila mga mahal sa kabuhi ang handum sang pamilya sang mga biktima nga padayon pa nga maila tubtob subong.