ILOILO CITY - Naghugpa sa Iloilo Airport sa Cabatuan, Iloilo ang eroplano sang ORBIS International, isa ka non-profit organization nga ginatawag ORBIS Flying Eye Hospital.

Ini agud maghatag sang libre nga operasyon sa mata kag training para sa mga opthalmologist sa syudad kag probinsya sang Iloilo.

Ang libre nga operasyon ang patigayunon mismu sa sulod sang eroplano sa diin nahamtang ang mga moderno nga equipment nga ginapahayag wala pa sa Pilipinas.

Nahibaluan nga ang Iloilo ang pinakauna nga lugar sa Pilipinas nga ginpadulungan sang nasambit nga flying eye hospital sa diin magatinir ini sang duha ka semana antes magpadulong sa syudad sang Bacolod.

Ang syudad sang Iloilo kag Bacolod lang ang napilian sang grupo nga lugar nga ila hatagan sang libre nga serbisyo sa Pilipinas.

Ang mga luyag makaangkon sang libre nga serbisyo ang dapat magpaidalum anay sa screening sa Western Visayas Medical Center.