ROXAS CITY – Patay ang isa ka duha ka tuig nga bata samtang pilason naman ang duha ka iban pa sa pag-arado sang truck nga may karga nga tubo sa duha ka puluy-an sa Barangay San Esteban, Pilar, Capiz.

Ginbawian sang kabuhi ang menor de edad nga si Cathlea Sabala bangud sa patal nga mga pilas nga naangkon samtang padayon naman nga ginabulong sa hospital ang pilason nga mga utod nga sanday Kim Regon kag Apple Sabala.

Base sa imbestigasyon sang mga katapu sang Pilar police station, nadulaan sang kontrol sa ginamaneho nga truck ang hubog nga driver nga si Eric Fariñas sang Sara, Iloilo.

Suno pa sa pulisya, una nga ginhapit sang truck ang duha ka mga tricycle nga naka-park sa kilid sang karsada antes pa gin-arado ang balay sang pamilya Sabala kag ang kaiping nga balay ni Mr. Celso Lubaton.

Hugot naman nga ginabantayan sang mga otoridad ang suspek nga ginabulong sa Bailan District Hospital bangud sa naangkon nga kapilasan.