KORONADAL CITY - Ginpanginwala sang Moro Islamic Liberation Front (MILF) nga sila ang yara sa likod sang napaslawan nga pagpapalagyo kay Datukan Samad alyas Lastikman, isa ka high profile-inmate sa Kidapawan City jail.

Paathag ni MILF Military Spokesman Von Al Haq, indi matuod ang mga alegasyon nga ang ila grupo ang may kahimuan sang napaslawan nga misyon sa pagpapalagyo kay Lastikman bangud indi naman ini miembro sang MILF.

Nagguwa ang nasambit nga akusasyon matapos nga gin-atake sang MILF ang provincial jail sang North Cotabato sang 2009 agud i-rescue ang ila nga upod nga napreso diri.

Nahibaluan nga si Lastikman ang naangot sa pagpatay sa 30 ka tawo sa Pikit, North Cotabato sang nagligad nga mga tinuig, suspek man ang ila nga grupo sa mga highway robberies sa Cotabato-Davao national highway.

Magluwas diri, nagapangatubang man si Lastikman sa kaso nga kidnapping with ransom, robbery, double homicide kag multiple murder.