ROXAS CITY – Nagtuga sang lubos nga kakulba sa madamu nga mga residente ang nadiskubre nga pagtagas sang langis gikan sa power plant sang isa ka kompanya nga naga-suplay sang kuryente sa bug-os nga probinsya sang Capiz.

Nagahimu na karon sang tikang ang lokal nga pamunuan sang Panit-an, Capiz, agud masolosyunan ang oil spill gikan sa power plant sang Inner Vantage Company nga naga-operate sa nasambit nga banwa.

Una na nga natalupangdan sang mga residente sadto pang adlaw sang Miyerkules kag Huwebes ang nagalapta nga langis sa Timpas Creek.

Ginpabutyag sa Bombo Radyo Roxas ni Barangay Kapitan Liberato Degones Jr., sang Barangay Timpas, nga pila na ka drum sang langis ang nakuha sang mga empleyado sang nasambit nga planta gikan sa creek kun sa diin natukiban ang malapnagon nga oil spill.

Suno pa kay Degones, natalupangdan naman sang mga residente sa lugar ang patay nga mga isda nga nagalutaw na sa tubig.