BACOLOD CITY – Pagahimuon nga lead dancer sang Department of Health si Presidente Benigno Aquino III para sa pagapatigayunon nga JAM Step ukon ang dululungan nga aerobic exercise sa maabot nga bulan sang Hulyo.

Ang JAM Step ang ginapatigayon nga programa ni Bacolod Lone District Cong. Anthony Golez.

Suno kay Cong. Golez nga ginhambal sa iya ni DOH Secretary Enrique Ona nga ang programa sini ang pagahimuon nga major program sang DOH bangod ini ang nagapromote sang healthy lifestyle sang mga kabataan.

Natalana nga pagasuguran sang DOH ang nasambit nga programa sa bug-os nga pungsod Pilipinas sa maabot nga bulan sang Hulyo kag ang ciudad sang Bacolod ang pagahimuon nga main stage kon sa diin, diri magapadulong ang presidente nga amo ang magapamuno sang dululungan nga pag-exercise.

Ginpahayag dugang sang mamalidha nga ang pagkabutang kay Presidente Aquino agud mamuno sang JAM Step ang nagapatimaan nga hugot ang pagpangampanya sang DOH para sa healthy lifestyle sang mga Pilipino.

Sa karun, padayon nga ginapatigayon diri sa ciudad sang Bacolod ang nasambit nga programa kon sa diin, ini ang supurtado sang mga estudyante sa elementarya kag sekondarya.

Sa maabot nga Pebrero 12, pagapatigayunon ang dululungan nga pag-exercise sang linibo ka mga estudyante sa daan nga airport sang ciudad.

Ini sa tuyo nga makahimu sang panibag-o nga record sa Guiness Book of World Record bilang largest dance group sa bug-os nga kalibutan.