KORONADAL CITY - Padayon sa gihapon nga mabatyagan sa South Cotabato kag mga kaiping nga mga lugar ang 30 minutos tubtub isa ka oras nga rotational brownout subong nga bulan.

Ginsuguran ang pag-rasyon sang koryente sa mga lugar nga sakop sang South Cotabato Electric Cooperative (SOCOTECO) 1 kag 2 ilabi na sa mga probinsiya sang Sarangani kag South Cotabato sang nagligad nga bulan.

Magapadayon suno pa ini bangud indi pa stable ang supply sang koryente gikan sa mga hydroelectric plants sang National Power Corporation (NPC).

Madumduman nga ginbutang sang National Grid Corporation of the Philippines (NGCP) sa “red alert” status ang Mindanao lakip na ang mga services area sang SOCOTECO bangud sa kakulangan sang supply sang koryente nga naglab-ot sa 100 mv.

Sa pag-umpisa sang bulan sang Pebrero, liwat naman nga ginpahibalo sang NGCP sa mga electric cooperative sa bug-os nga Mindanao nga mangin epektibo sa gihapon ang power load curtailment nga una na nga ginpatuman.