LA UNION – Naipaiman kadagiti kameng iti pulisya ti maysa a vintage bomb a nagatang ti junkshop owner idiay Barangay Amallapay, ili ti Tubao, La Union.

Naammuan ti Bombo Radyo La Union manipud idiay Tubao Municipal Police Station, ti nasao a pampabittak ket insuko iti makinkukua junkshop a ni Cesar Tubera, 37, residente ti nasao a lugar.

Saan a namnamaen ni Tubera a ti ginatangna a sinak-sako nga scrap materials manipud iti maysa nga agbutbote nga addaan daytoy ti bomba.

Ti vintage bomb ket addaan iti rukod a 59 cm ti kaatiddag ken 14 cm met iti diameter.

Iti pakasaritaan makunkuna a ti La Union ket karaman kadagiti lugar iti pagilyan no sadino ket napasamak met ranget dagiti suldado nga Amerikano ken Pilipino laban iti puwersa ti Hapon idi maikaddua a gubat ti sangalubongan isu a saan a nakakasdaaw nga adda iti nakalemmeng a vintage bomb idiay probinsya.