LAOAG CITY – Dimmapo ti kamarin ken opisina  ni sigud a Mayor Leonardo Velasco nga itan board of director ti Ilocos Norte Electric Cooperative, Bacarra District gapu ti pannakauramna idi laeng rabii.

Segun kenni SFO2 Vener Adina ti Bureau of Fire Protection ti nasao nga ili nga alisto a dimakkel ti apuy gapu ta naaramid iti light materials ti kamarin nga nakairamanan ti opisina ti dati a mayor.

Nupay kasta, alisto met laeng a nasebseban babaen ti tulong dagiti bombero ken firetrucks ti nasao nga ili.

Iti agdama ket saan pay a masinunuo ti nakaigappuan ti uram ken no mano ti balor dagiti nauram a sanikua ken kagamitan.

Ituloy ita  nga aldaw ti BFP ti imbestigasyunda tapno maammuan ti nakaigappuan ti uram.

Naammuan  a ti laeng caretaker ti adda idi napasamak ti insidente.