LAOAG CITY -  Ikonsiderar ni Pasuquin Sangguniang Bayan Member Dante Viernes nga harassment ti inaramid kenkuana ni dati a Mayor Oscar Aguinaldo.

Iti pannakiinnuman ti Bombo Radyo kenni Viernes, kuna na a mangmangan kadua na ti uppat a kapitan ti barangay iti maysa a kantina iti asideg ti munisipyo idi nakita na a limmabas ti lugan ti dati a mayor.

Kalpasan ti sumagmamano a minuto ket nagsubli ti lugan ti mayor ken nagparada iti sango ti pangpanganan da.

Bimmaba ni Aguinaldo kadua na ti agarup lima a bodyguards na ket inasitgan daytoy ti dati a mayor ken nakipinnereng iti nasurok sanga dangan laeng a distansiya dagiti rupa da.

Gapu iti amak ni Viernes ket in-inot nga immadayo ken nagpupok iti uneg ti library agingga a napan innala dagiti pulis.

Ni Viernes ket immunan a nakasusik ken nakalak-am iti kabil iti dati a mayor ken maysa daytoy kadagiti nangipila ti kaso kontra kenni Aguinaldo ken ti  asawa na a ni Mayor Vicky Aguinaldo mainaig kadagiti maatap a maanomalya a proyekto idiay Pasuquin Ilocos Norte.