LAOAG CITY - Naitaray iti Laoag City General Hospital ti maysa a lalaki kalpasan a nagsagaba ti dakkel a sugat iti bakrang na gapu ti panangwasay kenkuana ti karruba da.

Nabigbig ti biktima a ni Gil Racho, agtawen ti 69, balo ken residente iti Brgy. Caoacan ti ciudad ti Laoag idinto a ti suspek ket ni Jun Javier, addaan ti husto nga edad, ken residente met laeng iti nasao a barangay.

Basar iti palawag ti biktima, immuna a nangriribuk ti suspek iti karrubada gapuna nga liniklikan ti biktima ngem sinurot na daytoy iti pagtaengan da agingga nga naaddaan da ti komosyon ken naglabanda.

Dagus met a nagresponde dagiti pulis ngem  awanen ti suspek gapu ta nakalibas.

Awan met ti ammo ti biktima a rason nga dinangran ti suspek.

Ti suspek  iti dayta a gundaway ket nabartek.