LAOAG CITY – Nasuspenso ti tallo a doctor ti Gov Roque Ablan Sr Memorial Hospital, ti ospital ti gobyenro probinsiyal ti Ilocos Norte kalpasan nga inaprobaran ni Gobernador Imee Marcos ti rekomendasyun ti disciplining authority ti ospital.

Segun kenni Provincial Legal Officer, Atty. Jayson Fereira, napatawan ti 90-day preventive sus pension dagiti tallo a doctor nga isuda Dr. Marie Antonette Pasion, Dr. Maribel Albano kenni Dr. Lynette Formantes, agpapada a doctor ti Obstetrics Gynegology (OB-GYNE) department ti GRASMH.

Dagiti nasao a doktor ket sumangsango ti reklamo gapu ti panagited da ti coded prescription kadagiti pasyente da ken ibilbilin da pay ti igagatang da ti agas iti maysa a parmasya a masarakan laeng iti sanguanan ti provincial hospital.

Inlawlawag ni Fereira a ti naipataw a suspension ket saan a pannusa ngem ketdi addang laeng ti disciplining authority tapno saan pay laeng a sumrek iti trabaho da dagiti nasao a doctor bayat a maiwayat ti imbestigasyun iti reklamo kontra kadakuada ken bayat pay a maiyur-uray ti panangisumitir da iti palawagda.