LAOAG CITY – Maysa a prayer vigil ti naiwayat iti Surong Valley ti Vintar, Ilocos Norte tapno makontra ti plano a pannakaiyusuat ti mining exploration babaen ti maysa a dakkel a mining corporation iti nasao a lugar.

Segun kenni Bise Mayor Ferdinand Mabanag nga gagem ti prayer vigil nga palagipan dagiti umili iti dakes nga epekto ti panagminas iti aglawlaw.

Paset ti prayer vigil ti pannakasindi ti kandela tapno maipakita ti gobyerno lokal nga nakasagana a manglaban iti operasyun ti panagminas iti aniaman a barangay iti nadakamat nga ili.

Immuna iti daytoy ket naipadamag a nakipinnirma ti memorandum of agreement dagiti indigenous people ti Brgy. Canaam tapno maiwayat ti mining exploration iti nasao a lugar.

Inadmitir ni Bise Mayor Mabanag nga saanda pay nga ammo ti nagan ti mining corporation a nakipinnirmaan dagiti indigenous people gapu ta awan pay ti tengngel da a kopya ti MOA.

Kuna na a naladaw ti pannakaiwayat ti public hearing gapu ta nalpasen a napirmaan ti katulagan.