LAOAG CITY – Naisalakan ti maysa a babai a naasawaan iti gandat a panangrames kenkuana ti maysa a lalaki a kinainuman ti asawa na iti Brgy. Sta. Maria, Piddig, Ilocos Norte.

Daytoy  ket kalpasan a dagus a nagawid ti asawa ti biktima a napanaganan laeng ti Gina  a ni Ernie Farinas ket bayat nga umas-asideg iti pagtaenganda ket nakita na ni Yulo Domingo nga bagkatna ti awan pootna nga asawa na.

Dagus nga inibbatan ni Domingo ti awan pook na nga asawa ni Farinas ken iruar na ti maysa a paltog ngem nakilaban ni Farinas ket naagaw na ti paltog.

Nangngeg met ti ina ni Farinas nga adda ti agrirriri iti ruar gapuna a rimuar ket nakita na laengen nga agkinkinnabil ti anak na kenni Domingo gapuna nga naganawa ngem aksidente a pimmutok ti paltog ket natamaan ti makinkannigid a gurong ti baket.

Dagus met a naglibas ti suspek a ni Domingo ket agingga ita birbiruken pay laeng dagiti otoridad.

Segun  kenni Chief of Police Omar David ti PNP Piddig, basar iti palawag ti biktima a ni alyas Gina, napukaw ti pootna gapu ti panangkabil kenkuana ni Domingo.

Kabayatanna, adda met iti nakana a kasasaad ti maysa a lakay nga agtawen ti 70 kalpasan nga isu ti nangibaw-ingan ti suspek ti pungtot na ket kinabkabilna daytoy gapu ti itutulong ti lakay  nga immawag ti tricycle tapno adda pakailuganan iti ina ni Farinas a maipan iti ospital tapno  mataming ti napaltogan a makinkannigid a gurongna.